Dakong gasto sa ICC
Kon ang sulti ni kanhi Presidente Rodrigo Duterte ang basehan, lisod nga mahibaw-an pilay ilang kuwarta:
Sa unang mga oras pag-atubang sa House Quad Committee sa Nobiyembre sa niaging tuig, nireklamo nga naglisod siya sa kamahal sa plite sa ayroplano ug sa bayranan sa hotel para sa tibuok delegasyon nga naglakip sa iyang mga abogado ug guwardiya; pero
Dihang gituki ang ilang joint bank account ni Bise Presidente Sara Duterte, niinsistir dili kahibulongan nga duna siyay P5 bilyones sa bangko kay pulos dato ug negosyante ang iyang duha ka asawa.
* * *
Makalili ta og pilay ilang kuwarta sa plano sa tibuok pamilya pagbiyahe sa The Hague para sa ika-80 nga birthday sa kanhi presidente karong Marso 28:
Nag-una na si Bise Presidente Duterte pagpangita og mga abogado nga manalipod sa kanhi presidente sa International Criminal Court (ICC);
Mosunod ang asawa sa kanhi presidente nga si Elizabeth Zimmerman ug mga anak nga silang Kongresista Pulong Duterte ug Davao City Mayor Baste Duterte; ug
Moabot sab ang kapuyo sa kanhi presidente nga si Honeylet Avanceña ug ilang anak nga si Kitty.
* * *
Kinahanglang mag-andam sila og minilyon ka pesos kon mokuyog hasta ang mga apo ug ubang kaparyentehan. Banabanang gasto sa kada usa nila:
Plite sa ayroplano gikan sa Davao ngadto sa Ninoy Aquino International Airport ug Rotterdam (P133,672 sa economy o P236,712 sa business class); ug
Kon mopuyo sa The Hague og usa ka semana, mogasto ang kada usa nila og dugang kapin sa P65 mil (P39,200 sa hotel,P22,344 sa pagkaon ug P3,920 sa transportasyon).
* * *
Labing seguro nangayo na og pasiunang bayad silang Nicholas Kaufman ug ubang sakop sa defense team sa kanhi presidente. Average nga bayad sa privately retained senior counsel: P560,000 kada adlaw. Mogasto og P125 milyones kada tuig. O P1 bilyon kay walo ka tuig ang kasagarang lahutay sa mga kaso sa ICC.
Pero wala mahasol sa dakong gasto si Pulong. Puslan mang moadto sa Netherlands, moduaw na lang sab sa laing 15 ka nasud: Hong Kong, China, Malaysia, Indonesia, South Korea, Japan, Vietnam, Cambodia, USA, Australia, United Kingdom ug Northern Ireland, Germany, France, Belgium, Italy ug Singapore.
* * *
- Latest
