BFP nakadawat OG firetruck ug mga bag-ong sakyanan

CEBU, Philippines — Gitugyan sa kagamhanan sa siyudad sa Mandaue nga gipangulohan ni Mayor Glenn Bercede ang bag-ong firetruck tanker ug emergency ingon man first aid service team nga sakyanan alang sa Bureau of Fire Protection (BFP) sa dakbayan.

Gihatag sa kagamhanan ang maong mga kahimanan alang sa kabomberohan sa tinguha nga mapalambo pa ang ilang serbisyo ngadto sa mga Mandauehanon.

Niadtong Lunes Enero 6, 2025 ang Philippine Coast Guard sa siyudad sa Mandaue gihatagan usab og usa ka Toyota pick-up nga sakyanan.

Si Coast Guard Station Commander Alex Capangpangan nga nahinabi sa mga tigbalita miingon nga ang gihatag nga sakyanan sa kagamhanan adako kaayo og ikatabang ngadto kanila sa mga relief operation nga ilang pagahimoon ug sa pagtubag panahon sa emerhensiya.

Sa nasayran nga una na nga gipalig-on sa lokal nga kagamhanan sa maong dakbayan ang City Disaster Risk Reduction and Managemdent Office sa pag-abag sa kabomberohan sa pag-responde sa sunog ug uban pa nga mga emerhensiya.

Ang BFP ug Mandaue City Disaster Risk Reduction Management Office nagtambayayong sa pagresponde sa emergency nga mga panghitabo sama sa sunog.

Gikalipay sa mga sakop sa BFP ang gihatag nga brand new firetruck ug first aid & service vehicles gikan sa kagamhanan sa Mandaue City.

Dako og ikatabang sa operasyon sa BFP ang suporta nga gihatag sa LGU Mandaue.

Gipahigayon ang pag-blessing sa firetruck ug service vehicles nga gisaksihan sa mga sakop sa BFP pinangulohan ni F/SINSP Eraño Fernandez ug CDRRMO sa pagpangulo ni Buddy Alain Ybañez.

Kauban ni mayor Bercede sa paghatag sa mga bag-ong kahimanan sa BFP mao si ABC President Dante Borbajo.  MEL BANAT NEWS