Probinsiya nigahin og dugang ?40M sa disaster preparedness
CEBU, Philippines — Gidugangan og ?40 milyones ang pundo sa disaster preparedness ug response sa Sugbo human giaprobahan sa Cebu Provincial Development Council (PDC) ang dugang nga alokasyon alang sa 2027 diin nikabat ang kinatibuk-ang proposed disaster risk reduction and management (DRRM) budget ngadto sa ?440 milyones.
Giaprobahan ang dugang nga pundo atol sa fourth-quarter meeting sa PDC niadtong Nobiyembre 16, 2026 human nasuta ang panginahanglan gawas sa unang ?400 milyones nga naaprobahan alang sa DRRM Annual Investment Plan (AIP).
Gipresenta sa hepe sa Provincial Disaster Risk Reduction and Management Office (PDRRMO) Dennis Francis Pastor ang proposed budget adjustment nga matud niya kinahanglanong pundo nga wala naapil sa orihinal nga plano.
Matud ni Pastor nga unang giaprobahan sa Provincial Disaster Risk Reduction and Management Council (PDRRMC) ang ?400 milyones nga DRRM AIP niadtong Septiyembre sa wala pa kini gi-endorso sa PDC niadtong Oktubre.
Apan sa sunod nga pagsusi sa plano, nakita ang pipila ka kalihokan ug panginahanglan sa dugang nga alokasyon.
Sa dugang nga ?40 milyones, ?28 milyones ang igahin alang sa Disaster Preparedness Anticipatory Action for Hazard-Specific Events nga wala naapil sa unang DRRM investment plan.
Ang nahibiling ?12 milyones idugang sa Quick Response Fund (QRF) diin gikan sa ?50 milyones mosaka kini ngadto sa ?62 milyones.
Gipasabot ni Pastor nga ang pagdugang sa QRF gitumong aron matuman ang gikinahanglang 30 porsiyentong bahin niini ubos sa DRRM fund allocation.
Gipangulohan ni Gobernador Pamela Baricuatro, isip PDC chairperson, ang maong miting nga gitambongan usab ni fourth district Representative Sun Shimura, mga mayor sa Sugbo nga gipangulohan ni League of Municipalities of the Philippines-Cebu president ug Cordova Mayor Cesar Suan ingon man mga representante sa national government agencies ug civil society organizations. (BANAT NEWS)
- Latest















