Kamatayon sa na-unong nga mabdos ug masuso imbestigahon
CEBU, Philippines — Naghimo na og imbestigasyon ang Provincial Health Office (PHO) kabahin sa viral social media video sa usa ka bana nga nangayo og hustisya sa gidangatan sa iyang asawa ug wala pa matawo nga anak nga parehong naunong og kamatay samtang giatiman sa Barili District Hospital niadtong Nobiyembre 9 ning tuiga.
Matud pang PHO Chief Dr. Jenina Canoy nga gisugdan na nila ang pagpangolekta sa impormasyon kabahin sa insidente pinaagi sa pagpangayo og incident reports gikan sa doktor nga naka-duty ug ubang medical personnel nga mitambong sa pasyente.
Nakaestorya na usab siya sa usa sa mga doktor nga nalambigit, apan naghulat pa sila sa pormal nga mga taho sa mga doktor ug nurse.
Gikumpirma ni Canoy nga gi-refer ang pasyente sa Cebu Provincial Hospital sa Carcar ug nakonsulta ang OB-GYN alang sa medical guidance. Gidawat usab kuno sa maong ospital ang referral, apan adunay mga instruksyon nga kinahanglan sundon sa Barili medical team sa dili pa ibalhin sa ila ang pasyente.
"There were instructions prior to the transport, so ang OB naay gihatag nga mga instructions and gisunod ra gyud sa atoang mga physicians on duty in Barili," matud ni Canoy.
Gipasabot usab ni Canoy nga kasagarang likayan ang internal examination kon kumpirmado na ang placenta previa tungod sa risgo. Ang maong kondisyon mahimong mailhan pinaagi sa ultrasound ug kasagarang nalambigit sa pagdugo sa puwerta nga walay kasakit.
"Kung identify gyud na siya, and diagnose for placenta previa, which can be seen in ultrasound in whichever trimester of the pregnancy, so ma-avoided gyud na siya ang internal examination," matud niya. Ang lalaki sa video sa social media nga si Jhovell Patlingrao nangutana kung sakto ba ang gibuhat sa mga medical personnel nga niatiman sa iyang asawa nga si Angelle Fe Isugan.
Partikular ana giingong internal examination (IE) nga gibuhat ngadto sa iyang asawa bisan og naa sa prenatal record nga iyang gitunol sa medical staff nga na-diagnose ang iyang asawa og placenta previa.
Gikwestyon pud niya nganong dugay kaayong gi-refer iyang asawa
Cebu Provincial Hospital sa Carcar, diin adunay espesyalista nga obstetrician-gynecologist (OB-GYN).
"Perti nang daghanang dugo, luoy na kaayo na akong asawa. Kanus-a man na ninyo i-refer?" maoy iyang nahinumdoman nga iyang pangutana sa mga personnel.
Matud ni Patlingrao, giingnan siya nga dili pa madala ang iyang asawa tungod kay dili pa lig-on ang blood pressure niini ug kinahanglan una kining mokusog.
Apan si Canoy miingon nga padayon pa nilang gipamatud-an kon unsang mga medical records ug impormasyon ang gihatag ni Patlingrao sa Barili hospital sa pagdala niini kang Isugan didto. Base sa inisyal nga impormasyon, gidala sa emergency room ang pasyente. Gikatahong sa rural health clinic nagpa-prenatal checkup si Isugan ug sa pribadong pasilidad nagpahimo sa pipila ka laboratory tests.
Matod niya, gikonsulta sa Barili medical officer ang OB-GYN sa provincial hospital ug apil sa mga instruksyon nga gihatag ang paghimo og internal examination (IE).
Gipasabot ni Canoy nga adunay internal referral arrangement ang 16 ka ospital sa probinsiya aron makakonsulta ang mga doktor sa mas daghang espesyalista kun adunay pasyenteng nagkinahanglan og mas taas nga lebel sa pag-atiman.
Atol ning pagsuwat sa balita, padayun pa ang imbestigasyon sa PHO sa nahitabo.— IBM BANAT NEWS
- Latest















