EDITORYAL - Pulos lang plano, way nahimo
Mahigmata unta ang mga hingtungdang mga ahensiya, pribadong sektor ilabi na kadtong dunay kapasidad nga mamuhonan nga hatagan og atensyon ang posibilidad nga kakulangon sa suplay sa tubig dinhi sa Sugbu.
Kaning kabalaka bahin sa suplay sa tubig sa Sugbu, karon lang usab nabalik-balik og hisgut tungod sa umaabot nga epekto sa super El Niño nga gikabalak-ang makapa-uga sa palibot ug momenus ang normal nga gidaghanon sa ulan kada bulan.
Kaning maong phenomenon molanat pa hangtud sa sunod tuig ug gikatahong mograbe ang epekto karong sunod bulan, Disyembre hangtud sa unang kwarter sa 2027.
Pagkakaron, duna nay mga barangay nga nakamatikod sa pagnihit sa ilang tubig, apan wala pa gyuy barangay nga maingon ta nga nagka-problema na gyud kay nangamatay na ang ilang mga pananom ug mga binuhing hayop tungod kay wa nay mainom.
Paabuton pa ba ni nga mahitabo ayha molihok pagpangita og solusyon?
Atol sa Cebu Water Summit kagahapon nga gitambungan sa nagkadaiyang sector uban sa mga lokal nga kagamhanan gikumusta og balik kung unsa nay nabuhat sa mga kaniadto mga planong buhaton para sa seguridad sa suplay sa tubig.
Daghang mga nisaad nga mao ni, mao na ang ilang buhaton—pero ang pangutana, nabuhat ba gyud? Usa na niana, kanang pirmeng mogawas sa balita nga magtukod og dam—hain naman na karon?
Unsa may gibuhat sa mga local officials, giseryuso ba nila ang pagpangayo og tabang sa nasudnong kagamhanan para ani?
Naninuod ba sila pagdasig sa mga mamuhonan para matukod ni ang dam? Unsa may rason nganong wala ni mahitabo?
Kaning Cebu Water Summit gasugod niadto pang tuig 2023, daghang mga nanggawas nga mga ideya kung unsaon pagsiguro ang suplay sa tubig nga dili maputol ug makaabot gyud sa mga komunidad, naay mga nisugyot og imprastraktura, mga polisiya o ordinansa para gyud ani--- pero wala may nakita.
Si Engr. Maria Nenita Jumao-as, executive director sa University of San Carlos-Water Resources Center Foundation Inc. nanawagan nga kinahanglang dunay kooperasyon ug koordinasyon ang tanan para mabuhat kining mga plano.
Dapat sa summit kagahapon, aksyon na maoy sunod buhaton, dili na pulos gihapon plano.
- Latest

















