Recto, suportado ang planong IPO ng Angkas sa 2027

MANILA, Philippines — Malugod na tinanggap ni Executive Secretary Ralph Recto ang planong initial public offering (IPO) ng Angkas sa 2027, na maaaring magbigay ng pagkakataon sa mga biker-partner na maging shareholder ng kumpanyang kanilang tinulungang palaguin.
Sa opisyal na Facebook post ng Office of the Executive Secretary, binigyang-diin ni Recto ang kahalagahan ng pagbibigay ng mas maraming oportunidad sa mga rider.
“Dati, may bahagi kayo sa bawat pasahe. Ngayon, may pagkakataon din kayong magkaroon ng bahagi sa mismong kompanya,” ani Recto.
Kasunod ito ng ceremonial IPO announcement ng Angkas noong Nobyembre 14 sa Solaire, kasabay ng ASEAN Business and Investment Summit.
Dumalo sa pagtitipon sina First Lady Liza Araneta-Marcos, Recto, ASEAN-BAC Chair Joey Concepcion, at 25 pioneer Angkas biker-partners na nagsilbing mga panauhing pandangal.
Nauna ring nagbahagi ng personal na Facebook post ang First Lady tungkol sa paglalakbay ni Angkas CEO George Royeca at sa mga kabuhayang nalikha ng kumpanya.
Habang papalapit ang ika-10 anibersaryo ng Angkas sa 2027, hangad nitong mabigyan ng pagkakataon ang mga rider na makibahagi sa patuloy na paglago ng kumpanya.
- Latest



















