Mandaue magpalambo og mas komprehensibong DRRM portal

CEBU, Philippines — Nagplano ang kagamhanan sa Dakbayan sa Mandaue nga magpalambo og mas komprehensibong Disaster Risk Reduction and Management (DRRM) portal aron mas mapauswag ang pagtubag sa mga emerhensiya ug pagpangandam sa siyudad panahon sa kalamidad.

Gihisgotan ang maong sugyot atol sa Open Government Partnership (OGP) open discussion kagahapon tali sa Department of the Interior and Local Government (DILG)-Mandaue City ug nagkadaiyang civil society organizations.

Tumong sa gisugyot nga portal nga mas mapahapsay ang pag-deploy sa mga emergency response team ug mahatag ang tukma ug organisadong datos kabahin sa mga bakwit ug mga personnel nga andam motubag panahon sa kalamidad.

Gipasabot sa hepe sa Office of Strategy Management (OSM) Genee Lou Nuñez ang kamahinungdanon sa pagtukod og komprehensibo ug organisadong DRRM portal aron mapalig-on ang pagpangandam sa siyudad batok sa kalamidad ug masiguro ang kaluwasan sa publiko panahon sa emerhensiya.

Pinaagi sa maong sestema, gilaoman nga mas sayon na’ng ma-access ug mas organisado ang mga impormasyon kalabot sa kalamidad ilabina sa pagtino sa gidaghanon sa mga tawo nga kinahangla’ng ibakwit ug sa mga personnel nga andam motubag sa mga emerhensiya.

Apan giklaro sa opisyales sa DILG nga sugyot pa lang ang maong portal ug kinahanglan pa kining susihon sa kagamhanan sa siyudad.  Ilakip usab sa konsiderasyon ang mga komento ug rekomendasyon sa nagkadaiyang civil society organizations sa dili pa kini posibleng ipatuman.

Ang OGP usa ka nasudnong inisyatibo sa kagamhanan nga nag-awhag sa mga lokal nga kagamhanan nga makigtambayayong sa civil society organizations sa pagpalambo ug pagpauswag sa mga programa ug proyekto pinaagi sa participatory governance. Gipadayag usab atol sa panaghisgot ang kamahinungdanon sa pag-apil sa mga grupo sa katilingban sa proseso sa pagplano aron masiguro nga ang mga gisugyot nga programa makatubag sa mga panginahanglan ug kabalaka sa mga komunidad.

Sa iyang mensahe, gipadayag ni Mandaue City Mayor Thadeo “Jonkie” Ouano nga dili lang responsibilidad sa kagamhanan ang pagpangandam batok sa kalamidad apan kinahanglan usab ang pag-apil ug kooperasyon sa mga komunidad ug mga residente.

Gihisgotan ni Ouano ang mga epekto sa nangaging mga kalamidad sa mga komunidad, panimalay, negosyo ug adlaw-adlaw nga kinabuhi sa mga residente isip rason sa pagpalig-on sa panaghiusa tali sa kagamhanan siyudad, mga barangay ug publiko. BDB BANAT NEWS