Lea, napanood ni Angelina Jolie

Nagtanghal si Lea Salonga sa mga delegado ng ASEAN Inclusive Growth Summit noong Miyerkules, kung saan inawit niya ang ilan sa mga classic Disney song na nagdala sa kanya sa kasikatan sa buong mundo.

Sa mga video na ibinahagi ng ABS-CBN, makikita ngang inaawit ng Broadway icon ang Reflection at A Whole New World, na umani ng palakpakan kung saan kasama sa audience si Angelina Jolie.

Inawit din niya ang Tagumpay ­Nating Lahat.

Ang nasabing pagtatanghal ay bahagi ng summit, na nagtipon sa mga lider at iba’t ibang personalidad upang talakayin ang “inclusive growth” o inklusibong pag-unlad, at ang kahalagahang matiyak na naririnig ang boses ng bawat isa sa rehiyon ng ASEAN.

Katatapos lang ulit gumawa ni Lea ng kasaysayan bilang unang Pilipinong nakatanggap ng star sa Hollywood Walk of Fame, sa ilalim ng kategoryang Live Performance.