Lalaki nasakmitan og armas, shabu natingkagol sa prisohan
CEBU, Philippines — Nasikop ang usa ka 37-anyos nga lalaki human giingong nasakmiti og shabu ug armas diha sa Sitio Kiniasan, Barangay Bonbon, Dakbayan sa Sugbo niadtong Sabado sa gabii.
Ang suspetsado giila nga si Ruvic Cabajar Sibla, alyas “Ruvick”, residente sa Sitio Gila-Gila, Barangay Bonbon.
Base sa taho sa Cebu City Police Office (CCPO) nga nitubag ang mga sakop sa Malubog Police Station sa tawag sa usa ka concerned citizen kalabot sa usa ka lalaki nga gikatahong armado diha sa maong lugar.
Pag-abot sa mga polis, ilang nakita ang suspetsado nga nagtindog sa daplin sa dalan ug nakig-estorya kini sa laing tawo.
Samtang giduol sa mga polis ang lalaki, namatikdan sa mga operatiba nga aduna kini gisuksok nga armas sa hawak.
Daling gisignit sa mga polis ang suspetsado ug nakuha gikan sa iyang posisyon ang usa ka kalibre .45 nga pistola nga adunay pito ka buhing bala.
Na-recover usab gikan sa suspetsado ang upat ka gagmay’ng pakete sa shabu nga adunay gibug-aton nga 20 gramos ug gibana-banang nibalor ngadto sa P136,000.
Ang suspetsado natingkagol kini sa detention cell sa Malubog Police Station ug mag-atubang og kasong kalapasan sa Section 11, Article II sa Akta Republika 9165 kun “Comprehensive Dangerous Drugs Act of 2002”, Akta Republika Act 10591 kun “Comprehensive Firearms and Ammunition Regulation Act” ug Article 151 sa Revised Penal Code o resistance and disobedience to a person in authority. — /BDB BANAT NEWS)
- Latest
