Estudyante napusilan sa iyang ka lalis sa restobar
CEBU, Philippines — Usa ka 25-anyos nga estudyante ang naangol human kini pusila atol sa ilang panaglalis sa suspetsado diha sulod sa usa ka restobar sa Diversion Road, Barangay Poblacion 3, Dakbayan sa Carcar kagahapon sa buntag.
Ang biktima giila nga si Joseph Prinze Sonsona Hermia, taga Barangay Poblacion, Lungsod sa Sibonga ug fourth-year college sa usa ka unibersidad sa Lungsod sa Barili ang nakaangkon og samad pinusilan sa ibabaw nga bahin sa iyang wala nga bukton.
Samtang ang suspetsado nga si John Rey Rentuma Nacua, 29, minyo, residente sa Sitio Lagang, Barangay Ocaña, Dakbayan sa Carcar ang daling nasikop sa mga polis.
Base sa imbestigasyon sa kapolisan nga sa wala pa mahitabo ang pagpamusil nag- inom ang biktima ug suspetsadp uban sa ilang tagsa-tagsa ka kauban diha sa maong restobar.
Apan nagkalalis si Hermia ug Nacua ug giingong gisumbag ug gipatiran sa biktima ug sa iyang mga kauban ang suspetsado atol sa komosyon.
Gikatahong nibunot og pusil si Nacua ug gipusil si Hermia kinsa naigo sa bala sa ibabaw nga bahin sa iyang wala nga bukton ug dali kining gidala sa iyang mga kauban diha sa Carcar Provincial Hospital.
Ang mga sakop sa Carcar City Police Station nakadawat kini og taho gikan sa usa ka concerned citizen kalabot sa usa ka armadong lalaki nga nagpabuto og armas atol sa panaglalis.
Dali nga niresponde ang mga polis sa maong alarma ug pag-abot nila sa lugar ilang nakita ang suspetsado nga nagkupot pa sa armas.
Gidis-armahan ug gipusasan sa mga polis ang suspetsado ugg gidala sa police station.
Ang suspetsado mag-atubang kini og kasong attempted homicide. — /BDB (BANAT NEWS)
- Latest















