Lapu-Lapu ug Mandaue City nakadawat og pasidungog

CEBU, Philippines —  Nakadawat og pasidungog ang Lapu-Lapu City ug Mandaue City tungod sa ilang mga programa ug serbisyo sa panglawas atol sa 2026 Local Health Systems Awards nga gipahigayon sa Department of Health-Central Visayas Center for Health Development (DOH-CVCHD).

Gideklarar nga overall champion ang Lapu-Lapu City ug nakadawat og P250,000 nga cash prize, samtang nakakuha og 14 ka awards ug recognitions ang Mandaue City, lakip na ang ikaduhang pwesto sa Regional Healthy Communities Awards ubos sa Highly Urbanized City (HUC) category.

Gipahigayon ang awarding ceremony niadtong Biyernes, Nobiyembre 6, 2026, sa usa ka hotel sa Barangay Lahug, Cebu City.

Nakadaog usab ang Lapu-Lapu City sa Regional Healthy Communities Award nga adunay P200,000 nga cash prize, ug sa Performance-Based Incentive Award alang sa Barangay Health Workers (BHWs) nga adunay P300,000 nga premyo.

Nakakuha usab og gold awards ang City Health Office tungod sa 93.7 porsiyentong tuberculosis treatment success rate ug sa pagpatuman niini sa post-exposure prophylaxis (PEP) alang sa mga kaso sa napaakan sa hayop.

Nanguna usab ang siyudad sa Measles-Rubella Supplemental Immunization Activity (MR-SIA) ubos sa HUC category. Nakadawat usab kini og silver award alang sa TB-HIV collaboration pinaagi sa Provider-Initiated HIV Counseling and Testing services.

Nanguna usab sa ika-upat nga pwesto ang Barangay Caohagan taliwala sa mga barangay nga adunay maayong performance human niini naabot ang 100 porsiyento sa target nga mga bata nga angay makadawat og bakuna atol sa MR-SIA.

Gipadayag ni Lapu-Lapu City Mayor Ma. Cynthia “Cindi” King-Chan nga garbo sa mga Oponganon ang maong kalampusan ug nagpakita kini sa paningkamot sa siyudad sa pagpalig-on sa mga programa sa panglawas ug pagpalapad sa access sa importanteng serbisyo medikal.

Gipasalamatan ni King-Chan ang DOH-CVCHD, ubos sa pagpangulo ni Regional Director Dr. Joshua Brillantes, tungod sa padayong panagtambayayong ug suporta niini sa health workforce sa siyudad.

Samtang, nakakuha og ikaduhang pwesto ang Mandaue City sa Regional Healthy Communities Awards ubos sa HUC category ug nakadawat og P150,000 nga cash prize.

Nakuha usab sa Mandaue ang ikatulong pwesto sa Barangay Health Workers Performance-Based Incentives ubos sa maong category, nga adunay P100,000 nga premyo.

Ikaduha ang Mandaue sa MR-SIA ug nakadawat og silver awards alang sa chest X-ray screening ug molecular WHO-recommended rapid diagnostic (mWRD) testing rate ubos sa tuberculosis program niini.

Nanguna usab ang Social Hygiene Clinic sa siyudad sa HIV testing ug nakakuha og ikatulong pwesto sa pre-exposure prophylaxis (PrEP) enrollment.

Gihatagan usab ang Mandaue sa Apolinario Mabini Award for Voluntary Blood Services, lakip ang mga pasidungog alang sa kampanya batok sa rabies, pagpatuman sa electronic Logistics Management Information System (eLMIS), supply chain management ug Healthy Workplace Initiative.

Ginganlan usab ang Mandaue isip usa sa mga nominado sa 2026 Search for Outstanding Local Government Unit in Local Health Systems. (CEBU NEWS)