Baricuatro nipadayag og suporta sa NCEZ

CEBU, Philippines — Nisuporta si Gobernador Pamela Baricuatro sa gisugyot nga North Cebu Economic Zone (NCEZ) apan gitumbok niya nga kinahanglan kining kabahin sa mas halapad ug hiniusang plano sa kalamboan sa tibuok lalawigan.

Sa iyang sulat nga gipetsahan niadtong Nobiyembre 3, 2026 nga gitumong kang Bise Gobernador Glenn Anthony Soco, nagkanayon si Baricuatro nga dugay na’ng giila ang amihanang bahin sa Sugbo isip posibleng sentro sa kalamboan.

Apan wala matuman ang maong inisyatibo bisan pa nga gilakip na kini sa kanhing draft sa Provincial Development and Physical Framework Plan (PDPFP) alang sa 2019 hangtud sa 2028.

Matud sa gobernador nga nagpakita kini sa kamahinungdanon sa pagpadayon sa mga dugay’ng plano sa kalamboan bisan pa og adunay kausaban sa administrasyon.

Ug dili angay tan-awon ang NCEZ isip bulag nga proyekto apan kabahin sa mas lapad nga plano alang sa amihanan-sidlakang Sugbo nga adunay kalambigitan sa Metro Cebu ug kasadpang bahin sa lalawigan. Nagkanayon si Baricuatro nga kinahanglang ikonsidera ang mga epekto sa linog niadtong Septiyembre 30, 2025 ilabi na sa pagplano sa kalamboan ug paggamit sa luna sa mga apektadong lugar.

Si Baricuatro nagkanayon nga pinaagi sa maayong connection, imprastraktura ug mga kalihokan sa ekonomiya adunay potensiyal ang amihanan-sidlakang Sugbo nga mahimong dugang nga sentro sa kalamboan.

Tumong niini nga mapalapdan ang oportunidad sa panginabuhian ug negosyo sa gawas sa kasamtangang mga sentro sa kalungsoran,ug mapalig-on ang koneksiyon sa ekonomiya sa nagkadaiyang bahin sa lalawigan.

Ang tubag ni Baricuatro gumikan kini sa sulat ni Soco niadtong Oktubre 22 diin nangayo kini sa suporta sa gobernador alang sa pagtukod sa NCEZ aron makadani og investors, makamugna og trabaho ug makapadasig sa ekonomiya sa amihanang Sugbo.

Gisugyot ni Soco nga magtukod og mga sentro sa ekonomiya sa Dakbayan sa Bogo ug mga lungsod sa Medellin, Daanbantayan ug San Remigio.

Gilaoman nga mahimong sentro kini sa patigayon, pamuhonan, teknolohiya, panginabuhian, edukasyon ug industriya.

Gisugyot usab niya ang posibilidad sa pagtukod og usa ka freeport zone sulod sa maong lugar nga adunay kaugalingong customs territory, susama sa Freeport Area of Bataan. BDB BANAT NEWS