Cheetahs naglaraw nga inaton ang ilang labaw

CEBU, Philippines — Tumong sa Benedicto College (BC) Cheetahs nga inaton ang ilang labaw sa college division standings sa dihang ilang sangkaon ang Cebu Institute of Technology-University (CIT-U) Wildcats sa pagpadayon sa Cebu Schools Athletic Foundation, Inc. (CESAFI) Season 26 basketball tournament karong adlawa (Sabado, Nobiyembre 7) sa Cebu Coliseum.

Moasdang ang Benedicto sa alas-5 sa hapon nga duwa nga puno sa kompiyansa kay ila mang gilampaso ang Wildcats, 67-53, sa unang nilang panag-abot niadtong Septiyembre 20.

Ang kampo ni coach BJ Murillo nag-una karon sa karon sa liderato uban ang 9-1 win-loss rekord, samtang nagtabla sa ikaupat ug ikalimang puwesto ang Wildcats ug University of San Jose-Recoletos (USJ-R) Jaguars bitbit ang parehong 6-4 nga baraha.

Sa laing bugno sa kolehiyo, ang four-time defending champions University of the Visayas (UV) Green Lancers mosuway pagbitad sa 7-3 nilang rekord dihang ilang harongon ang University of Cebu Lapu-Lapu and Mandaue (UCLM) sa alas-3:30 sa hapon.

Laraw sa Lancers nga masubli ang ilang dakong kadaugan batok sa UCLM, 95-63, sa miagi nilang engkwentro niadtong Septiyembre 22.

Sa high school division, ang reigning five-peat champions Sacred Heart School-Ateneo de Cebu (SHS-AdC) Magis Eagles ug UCLM Junior Webmasters mosuway pag-inat sa perpekto nilang sinugdanan ngadto sa 8-0 sa dihang mosakbang sila batok sa managlahing mga                 kontra.

Ang Magis Eagles makigtigi sa 2-5 nga San Roque College de Cebu (SRCDC) Greyhounds sa alas-12:30 sa udto, samtang ang UCLM makigpinaksitay sa 2-7 nga San Carlos School of Cebu (SCSC) Baby Warriors sa alas-10:30 sa buntag nga pasiunang aksiyon.

Sa alas-2 sa hapon, magbangga ang 4-4 nga UV Baby Lancers ug ang 2-5 nga BC Baby Cheetahs.