Archival modawat og P100 milyon gikan sa Malacañang

CEBU, Philippines — Gilauman nga modawat si Cebu City Mayor Nestor Archival og dul-an sa P100 milyon nga pondo gikan sa Malacañang alang sa rehabilitasyon sa mga imprastrakturang nadaot sa Bagyong Tino atol sa iyang pagbisita sa Manila karong adlawa, Nobiyembre 5, 2026.

Matud ni Archival, kabahin kini sa pondo nga gigahin alang sa pag-ayo sa mga nadaot nga imprastraktura, lakip na ang mga tulay.

Gibutyag sa mayor nga mokabat unta sa P362 milyon ang orihinal nga alokasyon apan bag-o lang siya gipahibalo nga mga P100 milyon niini ang naapektuhan sa mga kausaban sa badyet.

Hisgotan niya kini sa iyang miting sa Manila aron masiguro nga mahatagan og prayoridad ang mga proyekto sa rehabilitasyon nga una nang natino ubos sa anaa nga pondo.

Dugang pa niya, padayon ang siyudad sa pagtubag sa mga panginahanglan sa mga pamilyang naapektuhan sa Bagyong Tino, ilabi na kadtong wala pa makakompleto sa ilang pagbalhin ug mga kahikayan sa pagpuyo.

Giila ni Archival nga nagpadayon pa ang paningkamot sa pagbangon gikan sa epekto sa bagyo, tungod kay adunay mga apektadong residente nga wala pa gihapoy permanente nga puy-anan bisan pa sa mga relocation site nga giandam sa siyudad. (BANAT NEWS)