23 ka balay nga nisulod sa 3-meter easement gipangguba
CEBU, Philippines — Niabot sa 23 ka balay diha sa Sitio Bato, Barangay Ermita, Dakbayan sa Sugbo nga nahimutang sa daplin ug ibabaw sa sapa ang apektado sa three-meter easement sa siyudad ug gihatagan ang matag pamilya nga apektado og P20,000 nga tabang pinansiyal gikan sa kagamhanan.
Kagahapon, mismo ang apaketadong pamilya ang nagbungkag sa ilang mga balay aron mahawan ang lugar ug makasulod ang mga ekipo nga gamiton sa pag-desilt o pagtangtang sa natapok nga lapok ug basura sa kanal ug imburnal.
Giklaro ni Mayor Nestor Archival nga ang operasyon gitumong sa pagsulbad sa balik-balik nga pagbaha sa Leon Kilat Street ug sa mga lugar nga konektado sa drainage system gikan sa E-Mall paingon sa Ermita ug Colon.
Matud sa mayor nga nagpahigayon og imbestigayon ang Department of Engineering and Public Works (DEPW) ug Department of Public Works and Highways (DPWH) uban sa iyang chief of staff nga si Kenneth Siasar ug konsehal sa Barangay Ermita nga si Jun Gabuya ug nasuta ang hinungdan nga dali kaayo nga mobaha sa maong mga lugar bisan gamay pa lang ang uwan.
Atol sa ilang pagsusi nasuta nga adunay dakong culvert sa Ermita nga napuno na sa lapok ug nabara ang agianan sa tubig hinungdan nga dili na makadagayday og tarong ang tubig ug dali kini nga motaas sa mga kanal kong panahon nga mo uwan.
Ug gumikan niini, gikinahanglan ang pag-desilt sa kanal diin nagkinahanglan og bug-at nga ekipo tungod sa gilawmon sa lugar nga moabot sa duha ka metros.
Apan nakit-an sa mga city engineer nga adunay 23 ka balay nga nakatukod ibabaw o duol sa easement nga kinahanglan tangtangon aron masugdan ang trabaho.
Ubos sa Executive Order No. 117 nga gipirmahan ni Archival niadtong Oktubre 21, 2026 gitukod ang Cebu City 3-Meter Easement Recovery Task Force aron mosusi ug modokumento sa mga estrakturang nisulod sa easement.
Si Archival nagkanayon nga niabot og usa ka buwan ang pagpangandam ug negosasyon sa mga apektadong residente.
Gihisgotan usab sa mayor nga adunay dokumentong gipirmahan ang mga residente nga nag-ingon nga sila mismo ang mobungkag sa ilang mga balay samtang gitugotan sila’ng gamiton ang mga materiyales nga mapahuwam sa kagamhanan.
Matud ni Archival nga tabangan usab sa kagamhanan ang mga pamilya sa pagtan-aw sa ilang panginahanglan sa pagbalhin ug pagpangita og laing kapoy-an pinaagi sa koordinasyon sa barangay. (BANAT NEWS)
- Latest















