Tokong gi-dispatsar ang Brazilian

CEBU, Philippines — Pwerteng hugyawa sa mga Pinoy fans human ang homegrown world class surfer sa Siargao nga si John Mark “Marama” Tokong gipukan si Brazilian World No. 11 Samuel Pupo para maka-abante sa Round 2 sa nagpadayun karong World Surf League (WSL) Championship Tour Philippines Pro sa Cloud 9 kagahapon, Domingo.

Nakapupo si Tokong og 16.60 points sa mga balod nga 8.60 ug 8.00, samtang ang Brazilian nakahimo lang og 11.00 sa ilang opening-round heat.

Dili sad lalim ang pressure kang Tokong tungod sa home crowd, pero nabuhat niya ang kinahanglang buhaton sa 6-hangtud-8-foot nga mga balod ubos sa kalmadong kondisyon aron ma-impress ang mga hurado.

Giangkon niya nga dili sayon mo-compete atubangan sa iyang mga kaparehas nga Pilipino apil pa iyang mga paryente, pero ang presyur nawagtang tanan sa dihang naa na siya sa dagat.

“It's crazy and amazing. There was a lot of pressure, but I just told myself to relax, keep things simple and enjoy the waves,” matud pang Tokong.

Matud pa niya, kani iyang pag-apil dili lang para sa iyang kaugalingon kondili para iyang pamilya, mga higala, fans ug labaw sa tanan para sa Pilipinas.

Naa pay sunod nga heat nga sagubangon ni Tokong ug nag-ampo siyang mapakitaan niya og maayong performance ang mga Pilipino.

Ang Philippines Pro gipresentar sa Philippine Sports Commission (PSC), uban sa suporta ni Surigao del Norte Gov. Robert Lyndon Barbers, General Luna Mayor Johnson Sajulga ug Vice Mayor Romina Sajulga.

Ang maong event gipaluyohan sab sa Philippine Amusement and Gaming Corporation (PAGCOR), Department of Tourism (DOT), Department of Public Works and Highways (DPWH), Tourism Infrastructure and Enterprise Zone Authority (TIEZA),ug NEA/SIARELCO.

Ang mga surfers nga natagak sa opening round makadawat gihapon og US$13,000 (o P830,000),  samtang ang champion makabitbit og US$80,000 (P5.1 million).

Ang kompetisyon gi- livestream sa One Sports YouTube channel ug Cignal Play. — IBM