Lady rider sa hit-and-run ng 8-anyos, tinutugis

MANILA, Philippines — Nanawagan ang Taguig City Police sa publiko at motorista na tulungan silang matunton ang isang babaeng naka-motorsiklo na tumakas matapos mabundol ang 8-taong gulang na batang lalaki sa Taguig City, noong Oktubre 13.

Ayon kay Taguig City Police Chief P/Colonel Julius Anonuevo, hu­mingi ng tulong ang mga magulang ng batang nabundol sa Magsaysay St., South Signal Village na madakip ang suspek na rider dahil sa matinding pinsala sa ulo at katawan ng kanilang anak na patuloy pang ginagamot.

Bigo umanong makilala ang suspek o makuha ang plate number ng motorsiklo kaya pakiusap ni Anonuevo na makipagtulungan ang sinumang nakasaksi at may impormasyon.

Maaari aniya, na may kuha sa CCTV o dash cam ang mga nakasaksi sa pangyayari na magagamit upang matunton ang suspek.

Tiniyak ng pulisya na itatago rin nila ang pagkakakilanlan sa mga taong makakatulong at makakapagbigay ng impormasyon.