4 katao nabagsakan ng metal truss
Sa ikinakabit na LED wall
MANILA, Philippines — Sugatan ang apat na katao nang mabagsakan ng bahagi ng bakal na pinagkabitan ng audio at lights sa Filoil EcoOil Centre na ipinatayo ng organizer sa technical supplier para sa isang religious gathering sa San Juan City noong Oktubre 30 ng umaga.
Ayon kay San Juan City Police Chief P/Colonel Anthony Gantang, dalawa sa sugatan ang miyembro ng religious organization habang ang dalawa ay ang crew at technician na nagkakabit ng LED wall.
Nakalabas na aniya, ng ospital ang tatlo habang ang isa ay patuloy pang inoobserbahan sa Cardinal Santos Medical Center dahil sa tinamong pinsala sa ulo.
Sa ulat, dakong alas-9:45 ng umaga nang maganap ang pagbagsak ng metal truss.
Nilinaw ng San Juan City government na nirentahan lamang ang Filoil Centre.
“The collapse involved lights and audio trusses set up by the organizer’s own technical supplier. The Filoil Centre itself remains structurally sound,” ayon sa LGU.
Agad na rumesponde ang City Disaster Risk Reduction Management Office, Philippine National Police at Philippine Red Cross.
Sasagutin umano ng technical supplier ang gastos sa pagkakaospital ng mga biktima.
Nabatid na inilipat na ang venue ng pagtitipon sa Makati City.
- Latest
