Higit 2k katao inilikas sa pagputok ng Mayon!
MANILA, Philippines —Mabilis na inilikas ang lokal na pamahalaan at mga awtoridad ng Albay ang nasa mahigit 2,000 katao sa ilang lugar na nasasaklaw ng 6-kilometer permanent danger zone (PDZ) sa lalawigan kasunod ng biglang pagputok ng Mayon volcano noong Biyernes.
Sa report na tinanggap ng National Disaster Risk Reduction and Management Center (NDRRMC) mula sa Albay Public Safety and Emergency Office (APSEMO), dakong alas-5 ng hapon noong Biyernes ay nasa kabuuan nang 746 pamilya o 2,041 katao ang inilikas.
Kabilang sa mga inilikas ay mga residente ng Tabaco City; Camalig at maging ang mga naninirahan sa Brgy. Baligang sa Ligao City.
Sa Tabaco City ay nasa 531 pamilya ang inilikas habang nasa 205 pamilya mula sa Camalig at 10 pamilya pa sa Ligao City.
Sa kasalukuyan, umiiral ang red alert status sa mga apektadong lugar habang patuloy ang monitoring sa kondisyon ng bulkan. Inalerto na rin ang mga residente rito na pinalikas sa 6-kilometer danger zone.
Namahagi na rin ang Provincial Health Office (PHO) ng nasa 22,000 surgical masks sa mga pasilidad ng kalusugan sa ilang mga lugar bilang proteksyon sa mga residente na apektado ng ashfall na ibinuga ng bulkang Mayon.
Samantala, inihanda na ng Department of Social Welfare and Development (DSWD) ang kanilang mga resources upang mabigyan ng tulong ang mga apektadong residente sa pagputok ng Bulkang Mayon sa Labay.
Ayon sa DSWD, pinakilos na nila ang kanilang Field Office (FO) 5-Bicol Region, at Social Welfare and Development (SWAD) Team upang makipag-ugnayan at tumulong sa paglilikas at pagbibigay ayuda sa mga pamilyang nakatira sa loob ng 6-kilometrong Permanent Danger Zone (PDZ) ng Bulkang Mayon matapos ang katamtamang pagsabog ng bulkan nitong biyernes.
Sinabi ni DSWD Spokesperson Irene Dumlao, nakikipag-ugnayan na ang naitalagang SWAD Teams sa Bicol upang makipag-ugnayan sa Camalig Municipal Disaster Risk Reduction and Management Office (MDRRMO) para matulungan sila sa pre-emptive evacuation ng mga residente na nasa six-kilometer danger zone.
- Latest
