P2.2 bilyon gisugyot nga budget pagpalambo sa VSMMC

CEBU, Philippines — Nangayo og ?2.2 bilyones nga budget ang Vicente Sotto Memorial Medical Center (VSMMC) alang sa 2027 aron mapalambo pa ang serbisyo niini isip Apex hospital ug mapalapdan ang kapasidad sa paghatag og espesyal nga pag-atiman sa mga pasyente.

Ang gisugyot nga pundo igahin sa pagpadayon sa mga prayoridad nga proyekto sa ospital lakip na ang pagtukod ug pagpalambo sa mga specialty center nga maghatag og mas espesyal nga serbisyong medikal sa Central Visayas.

Matud ni Dr. Gerardo Aquino, Jr. nga mas dako kini kompara sa halos ?2 bilyones budget sa ospital karong tuiga apan giklaro niya nga proposal pa lang ang ?2.2 bilyones alang sa sunod tuig.

 Usa sa mga prayoridad sa ospital ang pagpalig-on sa mga pasilidad aron matuman ang mandato niini isip Level 3 Apex hospital.

Gawas sa kinatibuk-ang serbisyo sa ospital gitahasan usab ang VSMMC sa pag-establisar og 17 ka specialty center nga motubag sa nagkadaiyang panginahanglan sa mga pasyente.

Lakip niini ang cancer center, orthopedic center ug heart center alang paghatag og mas espesyalisadong pagtambal sa mga nanginahanglan.

Matud ni Aquino nga ang mga construction nga makita karon sulod sa compound sa ospital kabahin sa pagpangandam alang sa pagpalapad sa mga serbisyong medikal niini.

Pinaagi sa maong mga pasilidad gilaoman nga mas daghang pasyente sa rehiyon ang makadawat og espesyal nga pagtambal nga dili na kinahanglang mobiyahe paingon sa Manila.

Gipadayag usab ni Aquino ang tabang nga gihatag sa Zero Balance Billing (ZBB) program sa mga pasyenteng nagpaospital.

Ang ZBB usa ka polisiya sa Department of Health (DOH) diin walay bayranan gikan sa kaugalingong bulsa ang mga kwalipikadong pasyente nga na-admit sa basic o ward accommodation sa mga DOH hospital.

Ubos niini nga programa, sakop sa subsidy ang mga bayranan sa ospital ug professional fees aron mapanalipdan ang mga pasyente gikan sa dugang nga pinansiyal nga palas-anon panahon sa ilang pagpatambal.  BDB BANAT NEWS