PNP hotline inilarga vs Bato arrest

MANILA, Philippines — Naglunsad ang Philippine National Police (PNP) ng mga hotline na maaaring tawagan o padalhan ng text message ng publiko upang magbigay ng ­impormasyon sa kinaroroonan ni Sen. Ronald “Bato” dela Rosa, habang nagpapatuloy ang pagtugis sa senador na binigyan hanggang Biyernes, Oktubre 30, upang kusang sumuko.

Ayon kay PNP Public Information Office Chief PCol. Allen Rae Co, layunin ng mga hotline na makatulong sa mga awtoridad na matunton si Dela Rosa at maipatupad ang warrant of arrest laban sa kanya. Hinikayat niya ang senador na sumuko nang kusa upang maiwasan ang posibleng madugong engkuwentro.

Sinabi ni Co na wala pang natatanggap na impormasyon ang PNP sa mga bagong hotline nang kapanayamin siya dahil kasisimula pa lamang ng mga ito. Tiniyak naman niyang poprotektahan ang pagkakakilanlan at numero ng telepono ng mga impormanteng magbibigay ng kapaki-pakinabang na impormasyon. Nagbabala rin siya na maaaring kasuhan ang sinumang gagamit sa mga hotline sa pagbibigay ng maling impormasyon o panloloko.

Iginiit ni Co na sapat ang puwersa ng PNP upang ipatupad ang warrant of arrest, ngunit bukas ito sa tulong ng Armed Forces of the Philippines (AFP) kung kinakailangan. Hindi pa rin umano naglalabas ng wanted poster laban kay Dela Rosa ang pulisya, ngunit maaari itong gawin kung makatutulong sa paghahanap sa senador.

Tungkol naman sa pahayag ng asawa ni Dela Rosa na kailangan ng senador ng tulong sa halip na pag-uusig, sinabi ni Co na kinikilala ng PNP ang mga naging ambag nito, ngunit ang pangunahing tungkulin ng pulisya sa ngayon ay ipatupad ang warrant of arrest. Handa rin umano silang makipag-usap sa asawa ng senador kung ito ang kusang lalapit sa kanila.

Nilinaw ni Co na hindi nangangahulugang ­titindi ang operasyon sa pagtatapos ng palugit sa Biyernes dahil tuluy-tuloy na ang paghahanap kay Dela Rosa.

Muli niyang hinimok ang senador na kusang sumuko upang maresolba ang usapin nang mapayapa at maiwasan ang pagkasawi o “pagdanak ng dugo.”