Lady Tams dumikit sa quarterfinals bonus

MANILA, Philippines -- Lumapit ang Far Eastern University sa pagdakma sa isang ‘twice-to-beat’ advantage sa quarterfinals matapos walisin ang College of Saint Benilde, 25-14, 25-9, 25-17, sa Round of 8 ng 2026 Shakey’s Super League (SSL) Unity Cup Huwebes sa Ninoy Aquino Stadium.  

Tinapos ng Lady Tamaraws ang kanilang laro sa Lady Blazers na wala pang isang oras para sa 2-0 record sa Pool E.

Maaari nang angkinin ng FEU ang isa sa dalawang quarters bonus sa kanilang grupo kung tatalunin ng five-peat-seeking National University (1-0) ang Adamson University (0-1) kagabi.   

Hindi pa natatalo ang Lady Tamaraws sa limang laro sa torneong itinataguyod ng Shakey’s Pizza Parlor, Peri-Peri Charcoal Chicken, Potato Corner at R&B Milk Tea.

Pumalo si opposite spiker Ia David ng 10 points at may pitong marka si Gerz Petallo para sa FEU.

Nagdagdag sina Cla Loresco, Alyzza Devosora at Jaz Ellarina ng tig-limang puntos, habang naglista si Karyll Miranda ng 10 excellent sets.

Lalabanan ng Lady Tamaraws ang Lady Bulldogs sa Nobyembre 7 sa Playtime FilOil Centre sa San Juan City para tapusin ang second round at madetermina ang puwestuhan sa crossover quarters ng torneong suportado ng Philippine Sports Commission, the Commission on Higher Education, Mikasa, Asics, Rigour Technology, Jersey Haven, Solar Sports at 12 Beyond Production bilang technical partners.    

Nagtala sina Arriana Pua at Mary Grace Borromeo ng tig-pitong puntos para sa ikalawang sunod na kabiguan ng Lady Blazers.