P4.2 milyon nga smuggled nga sigarilyo nasakmit

CEBU, Philippines — Gidakop ang usa ka 42-anyos nga lalaki ug nasakmit ang mga sigarilyong gibanabanang nagkantidad og P4.7 milyones sa hiniusang operasyon sa Cebu Police Provincial Office (CPPO) ug Bureau of Customs (BOC) sa Barangay Dumlog, Talisay City, niadtong Martes, Oktubre 27.

Gipahigayon ang operasyon sa mga personahe sa CPPO Provincial Intelligence Unit (PIU), sa koordinasyon sa BOC Cebu, human makadawat og mga taho kalabot sa giingong ilegal nga pagbaligya ug pag-apod-apod sa mga sigarilyong walay hustong dokumento.

Sa operasyon, nagpahigayon ang mga operatiba og test-buy o pagsulay sa pagpalit og usa ka master case sa sigarilyo nga nagkantidad og P10,000.

Sa pagsusi sa napalit nga sigarilyo nasuta nga wala kini sa gikinahanglang graphic health warnings o mga pasidaan sa hulagway bahin sa peligro sa pagpanigarilyo, subay sa Republic Act No. 10643 o Graphic Health Warnings Law.

Mao sab kini ang nakita sa uban pang mga ebidensiyang nasakmit atol sa operasyon.

Lakip sa mga nasakmit ang mga master case sa sigarilyong Astro, Redwood ug nagkalainlaing klase sa sigarilyo, lakip ang P10,000 nga kwartang gigamit sa test-buy transaction.

Gibanabana sa mga awtoridad nga mikabat sa P4.7 milyones ang kantidad sa mga nasakmit nga sigarilyo.

Gipangusgan sa gobiyerno ang operasyon batok sa mga sigarilyong pinalusot gikan sa laing nasud tungod kay gawas nga wala kini graphic health warning, wala kini moagi sa hustong proseso sa importasyon maong wala kini makabyad og custom duties ug buhis.

Tungod sab niini, barato kining gibaligya kun itandi sa mga legal nga produktong sigarilyo hinungdan nga nakapaalkanse sa mga legal nga kompanya sa sigarilyo.

Nakigtambayayong ang CPPO sa Bureau of Customs Cebu aron pagsubay kun niagi ba kini sa ilang adwana.

Gipahibalo ang gidakop nga lalaki sa hinungdan sa iyang pagdakop ug sa iyang mga katungod ubos sa Konstitusyon, gamit ang pinulongang iyang nasabtan.

Ang suspek ug ang mga nasakmit nga produkto gisiguro alang sa hustong dokumentasyon ug pagproseso subay sa balaod ug sa mga pamaagi nga gitakda.

Sumala pa ni CPPO Provincial Director Police Colonel Abubakar Udang Mangelen Jr. ang kamahinungdanon sa koordinasyon sa nagkalainlaing ahensya ug sa mga operasyong gibase sa impormasyon aron matubag ang giingong ilegal nga patigayon sa mga sigarilyo.

Matud ni Mangelen, importante ang pakigtambayayong sa BOC ug sa ubang ahensya aron madiskobrehan ug matubag ang posibleng paglapas nga naglambigit sa mga produktong sakop sa regulasyon.

Gipasabot usab niya nga magpadayon ang kapulisan sa pagpahigayon og mga operasyon subay sa balaod, pagpanalipod sa integridad sa mga ebidensya ug pagsiguro nga sundon ang hustong proseso sa pagpatuman sa balaod. IBM BANAT NEWS