Gipalusot nga karneng baboy sakmit sa DVMF
CEBU, Philippines — Niabot ngadto sa 26 ka kilo nga karneng baboy nga walay kompletong dokumento ang nasakmit sa Hot-Meat Enforcement Team sa Department of Veterinary Medicine and Fisheries (DVMF) sa usa ka stockyard sa Tres de Abril, Barangay San Nicolas Proper, Dakbayan sa Sugbo niadtong Oktubre 24, 2026.
Ang mga karne gituohang gikan sa Dakbayan sa Bogo ug gipanag-iya sa nag-abang sa stockyard nga giila sa alyas “Donald.”
Ikaduhang kalapasan na kini sa maong indibidwal hinungdan nga giisyuhan siya og citation ticket nga adunay multa nga ?5,000.
Matud sa DVMF nga nakalapas si Donald sa City Ordinance 2189 Section 4 o walay Meat Inspection Certificate., Department of Agriculture Administrative Order #5 Section 6 o Improper Handling of Meat ug Department of Agriculture Administrative Order #19 Series of 2012 Sections 10 ug 11 o Unhygienic Slaughtering and Handling of Carcass and By-Products tungod kay dili husto ang proseso sa paghinlo o paghugas sa mga karne.
Gipahinumduman sa DVMF ang mga namaligya og karne, mga operator sa stockyard ug mga negosyante sa lechon nga sundon ang mga lagda sa pag-ihaw, pagbiyahe, pagdumala ug pagbaligya sa karne aron luwas nga makaon sa mga konsumidor ang mga karne sa siyudad.
Nagpadayon usab ang operasyon sa DVMF sa pagsuta sa mga ilegal nga ihawan ug pag-monitor sa nagkadaiyang bahin sa siyudad aron masiguro nga limpiyo ang karne sa merkado ug mapanalipdan ang panglawas sa publiko. BDB BANAT NEWS
- Latest
