EDITORYAL - Mga hagit sa di pa ang Pasko

Nagsingabot na ang Pasko, dunay daghang mga nabalaka kung parehas pa ba kasadya ug kaabunda sa nangaging mga Pasko ang ilang matagamtaman karon tungod sa nagkagrabeng krisis.

Kaning gipasabot nga krisis, lain-laing og porma. Naay gikan sa tensiyon sa nasudnon ug lokal nga politika; tension sa Middle East; tension diha sa West Philippine Sea; kamahal sa presyo sa petrolyo nga nakaaapektar na sa presyo sa mga palaliton; gikabalak-ang pagtugpa sa super El Niño, mga bagyo, krisis sa suplay sa kuryente ug daghan pa.

Tanan kini makaapektar sa kapabilidad ug kapasidad sa matag Pilipinong nanarbaho para sa ilang tagsa-tagsa ka pamilya kay ang tanan nagkinahanglan og kwarta.

Parehas nalang anang sitwasyon karon sa suplay sa karneng baboy, apektado na tungod sa hulga sa African Swine Flu, dili na modawat ang Sugbu og mga baboy gikan sa mga lugar nga nahugpaan sa maong sakit sama sa isla sa Negros.

Kun magnihit ang suplay sa baboy dinhi, mapektohan sab ang tanang mga tawong nagsalig sa produktong gigamitan sa karneng baboy, kun nihit ang suplay, momahal sab kini ug karong Pasko usa ni sa kinaham nga panghanda sa mga pamilya.

Sa kahimtang pud sa enerhiya, kaning pagsige og brownouts gumikan sa kakulangon sa suplay sa kuryente gikan sa Mindanao ug sa Luzon para sa Kabisay-an, tinuyo man o dili—duna kini epekto sa mga tawo ilabi na karong umaabot nga Pasko.

Lain pang problema kaning tension sa Middle East, diin milyones ka mga Pilipinong OFW ang nagtrabaho. Ang epekto palang niini nabatyagan na pirme sa mga Pilipino  tungod sa pagsaka sa presyo sa petrolyo ug nitakod kini sa presyo sa batakang serbisyo ug palaliton.

Samtang tinuod daghan sa mga OFW ang nalipay kay nisaka ang balor sa dolyares nga ilang mapadala sa ilang mga pamilya dinhi, nameligro man pud ang kinabuhi sa uban didto.

Kani pud pagkubos sa balor sa Piso kontra dolyar dili maayo para sa ekonomiya sa nasud ug motakod kini ngadto sa kinaubsang lebel sa komersiyo sa lokalidad. Kaning Paskoha karon ug pagsugat sa Bag-ong Tuig dako kaayong hagit para sa mga Pilipino ang pagmentinar bisan nalang sa naandan nilang buhaton panahon sa okasyon.