Pang-limang sunod kinana ng Fighting Maroons
MANILA, Philippines — Kinadena ng University of the Philippines ang pang-limang sunod na panalo matapos paluhurin ang University of the East, 101-70, sa UAAP Season 89 men’s basketball tournament kahapon sa Ateneo Blue Eagle Gym.
Sinimulan nina Choi Palanca, Sean Franco, at LA Andres ang malaking ratsada ng Fighting Maroons bago naibaba ng Red Warrios ang hinahabol sa 11 puntos sa huling bahagi ng third quarter.
Nagtulong sina Palanca, Franco at Andres sa 17-2 atake ng UP na nagpalaking muli ng kanilang abante sa 87-61 sa 6:27 ng fourth period dahilan para magaan nilang nakuha ang panalo.
Nasolo ng Fighting Maroons ang top spot ng team standings tangan ang 7-2 karta, habang nabaon lalo sa ilalim ang Red Warriors na wala pa ring naipanalong laro sa siyam na salang.
“What we like in the game earlier sabi ni coach Gold (Monteverde), especially for the players that came off the bench, the excitement was there to play,” sabi ni assistant coach Christian Luanzon.
Pinamunuan ni Veejay Pre ang UP sa kanyang inirehistrong 14 points, anim na rebounds at limang assists at nag-ambag ng 13 markers si big man Gani Stevens kasunod ang 12 points ni Choi Palanca.
Tumikada naman si Toper Lagat ng 23 markers, dalawang boards at isang assist pero hindi sapat upang ibigay sa Red Warriors ang unang panalo ngayong season.
Bumakas si Mo Tañedo ng 11 points, tatlong assists, dalawang rebounds at dalawang steals.
Magkakaroon ng mahabang pahinga ang Fighting Maroons bago bumalik sa hardcourt kung saan ay makakatapat nila ang Adamson University Soaring Falcons sa Nobyembre 4 sa Smart Araneta Coliseum.
Sa ikalawang laro, muling pinana ng De La Salle Green Archers ang University of Santo Tomas Growling Tigers, 92-80, bagama’t hindi naglaro si star guard Jacob Cortez
- Latest
