Pacquiao chessfest motanyag og P1.5M nga premyo
CEBU, Philippines — Ang sadya nga bulan sa Disyembre mahimong mas malipayon alang sa mga magduduwa og ahedres nunot sa pagpahigayon sa National United Chess Federation of the Philippines (NUCFP) Chairman Manny Pacquiao 48th Birthday International Open Chess Championships sa Disyembre 13-15 didto sa dakbayan sa General Santos.
Kapin sa P1.5 milyon nga ganting salapi ang ipanghatag sa maong prestihiyosong tulo ka adlaw nga torneyo nga giorganisar sa NUCFP, sa pakigtambayayong sa Pacman Chess Association, Professional Chess Association of the Philippines, One Chess Movement, ug lokal nga kagamhanan sa Gensan.
Gawas sa tropeyo, ang kampiyon sa unang torneyo nga dunay pagtugot sa NUCFP mobulsa og P500,000. Ang malandig sa ikaduha ug ikatulong puwesto makadawat of P250,000 ug P150,000.
Ang motapos sa ikaupat nga puwesto mokubra og P100,000, samtang ang mopahiluna sa ikalima hangtod ikawalong dapit makakuha og P30,000 matag usa. Ang ikasiyam hangtod ika-15 makakuha og P10,000 matag usa.
Makadawat sab og pahalipay nga kuwarta ug medalya ang masud sa Top 50.
Aduna usab espesyal nga premyong P5,000 ug medalya alang sa labing maayong Senior, Lady, High School, Elementary ug Gensan players. Isip kauban nga kalihokan, ipahigayon usab ang inter-club tournament diin dagkong mga premyo ang gitagana.
Gilaoman nga makadugang kini sa kahinam sa maong kalikuhan sa chess ug maghatag og dakong higayon sa mga chess club nga makigtigi, magrepresentar sa ilang mga koponan ug makigbisog alang sa mga dagkong pasidungog.
Gipabarato usab sa NUCFP ang registration fee aron mas daghang magdudula ang makaapil sa torneyo.
Ang rehistrasyon nagkantidad og P4,000 alang sa NUCFP Gold members ug PCA members, P5,000 alang sa regular NUCFP members, ug P8,000 alang sa mga dili miyembro.
- Latest


















