Castro, ‘treasure’ kaya safe sa sibakan ng PCO

MANILA, Philippines — Inihayag kahapon ng bagong Presidential Communication Office (PCO) acting Secretary Lino Cayetano sa kanyang pag­harap sa mga miyembro ng Malacañang Press Corps na mananatili sa kanyang puwesto si Palace Press Officer Undersecretary Claire Castro na itinuturing umanong “treasure” ng gobyerno.

Ayon kay Cayetano, naipaparating ni Castro sa publiko ang mga ginagawang programa at mga isyu sa gobyerno kaya gusto niya itong makatrabaho sa mga programa ng admi­nistrasyon.

Sa pag-upo ni Cayetano sa PCO, nagsumite ng courtesy resignation ang mga opisyal na nasa ilalim ng tanggapan, at aaksiyunan niya ang mga ito sa mga susunod na araw.

Hindi naman aniya pakikialaman ng bagong kalihim ang matitinding banat ni Castro sa mga isyu lalo na kung may mga paninira kay Pangulong Ferdinand Marcos Jr. at sa gobyerno.

Suportado rin ni ­Cayetano ang paraan ni Castro sa paghahayag ng mga tugon ng pamahalaan kahit pa tila ito ay palaban.