Magsasaka todas sa suwag ng alagang kalabaw

MANILA, Philippines — Patay ang isang 54-anyos na magsasaka nang pagsusuwagin ng alaga nitong kalabaw matapos na magwala ang hayop habang ginagamit ito sa pag-aararo sa bukid sa bayan ng Don Carlos, Bukidnon, ayon sa ulat kahapon.

Sa report nangyari ang trahedya sa bukirin ng biktima as Brgy. Pinamaloy, Don Carlos ng lalawigan noong Martes bandang alas -3:40 ng hapon.

Ang nasawing biktima ay hindi tinukoy ang pagkakakilanlan maliban sa pagsasabing residente ito ng Purok Mabuhay, Brgy. Pinamaloy ng nasabing bayan.

Ayon sa imbestigasyon, nagsasaka ang biktima nang biglang huminto ang hayop dakong alas-3 ng hapon na hinihingal sa matinding pagod at sa gitna nang matirik na sikat ng araw.

Hinagupit ito ng magsasaka, tumayo ang hayop, pero sandali lamang ito at muli itong huminto na nagpapahinga bunga nito ay pinaghahagupit ito ng kaniyang amo ng ilang sunud-sunod. 

Naging bayolente ang hayop na pinagsusuwag ang kaniyang amo na nagtamo nang matitiding sugat sa kaniyang katawan partikular na sa bahagi ng ulo nito. Matapos ang insidente ay nagtatakbo naman ang nasabing kalabaw sa bahagi ng kagubatan.

Nagawa pang maisugod sa pagamutan ang nasabing magsasaka, pero nabigo nang maisalba ang buhay nito sa rami ng dugong nawala sa kaniyang katawan at malalim na sugat na tinamo nito.