6 dakma sa P39.7 milyong puslit na yosi
MANILA, Philippines — Nasamsam ng Philippine National Police (PNP) ang tinatayang P39.75 milyong halaga ng hinihinalang ipinuslit na sigarilyo sa tatlong magkakahiwalay na operasyon sa Misamis Occidental, Zamboanga Sibugay, at Zamboanga del Sur noong Oktubre 20 hanggang 21 na nagresulta sa pagkakaaresto ng anim na kalalakihan.
Dalawang lalaki ang unang inaresto sa Brgy. Silanga, Tangub City, Misamis Occidental noong Oktubre 20, matapos masamsam ang isang truck na may kargang sigarilyong nagkakahalaga ng P6.49 milyon. Dinala ang mga suspek at nakumpiskang mga produkto sa Tangub City Police Station para sa dokumentasyon at nakatakdang turn-over sa Bureau of Customs (BOC).
Kinabukasan, isa pa ang nadakip sa Brgy. Poblacion, Malangas, Zamboanga Sibugay, kung saan nakumpiska ang 100 master cases ng iba’t ibang sigarilyong nagkakahalaga ng tinatayang P5.73 milyon. Nasa kustodiya na ng Malangas Municipal Police Station ang suspek at mga nakumpiskang sigarilyo.
Sa ikatlong operasyon sa Purok Logpond, Old Labangan, Labangan, Zamboanga del Sur, tatlong lalaki, edad 31, 38, at 40, ang inaresto matapos makumpiska ang 448 master cases ng mga sigarilyong walang kaukulang dokumento at may tatak na Modern. Nasabat ang isang puting Isuzu wing van na umano’y ginamit sa pagbiyahe ng mga produkto. Tinatayang P27.53 milyon ang kabuuang halaga ng mga sigarilyo at sasakyan.
Dinala ang mga suspek sa Criminal Investigation and Detection Group (CIDG) Zamboanga del Sur Provincial Field Unit para sa dokumentasyon.
- Latest
