Rider patay human gibanggaan og dumptruck
CEBU, Philippines — Patay ang usa ka parcel delivery rider human nabangga ang iyang gimanehong motorsiklo s usa ka dump truck sa gikasugat nga direksiyon diha sa Sitio Ecotech, Barangay Liong, lungsod sa Dumanjug, Cebu, alas 9:45 sa buntag niadtong Miyerkules, Oktubre 14.
Giila sa kapolisan ang namatay sa alyas nga “Jeff” residente sa Barangay Lawaan, Dumanjug nga nagmaneho og itom nga motorsiklo sa dihang nahitabo ang aksidente.
Ang dump truck gimaneho ni alyas “Joseph,” 45, residente sa Barangay Tapon, Dumanjug. Kauban niya sa sakyanan ang heavy equipment operator nga si alyas “Dexter,” 22, residente sa Barangay Kantabogun, Aloguinsan.
Base sa inisyal nga imbestigasyon sa Dumanjug Municipal Police Station, ang nakabangga sa biktima mao ang usa ka Isuzu dump truck.
Sumala sa kapolisan, giingong paspas ang dagan sa dump truck sa dihang misimang kini ngadto sa pikas lane nga gisubay sa biktima hinungdan nga nabanggaan niya kini.
Tungod sa kakusog sa impact, misimang usab ang dump truck paingon sa kilid sa dalan ug nabanggaan ang duha ka kongkretong poste sa barbed wire nga koral ug pipila ka punoan sa saging daplin sa dalan.
Grabeng kadaot sa lawas ang naangkon ni Jeff ug gidala ngadto sa Barili District Hospital apan gideklarar siyang dead on arrival.
Gikustodiya karon sa Dumanjug Police Station si Joseph alang sa imbestigasyon, pagdokumento sa insidente ug pag-andam sa angay nga mga kasong kriminal.— IBM BANAT NEWS
- Latest
