DILG mogahin og P1B pagpangandam sa El Niño

CEBU, Philippines — Nagplano ang Department of the Interior and Local Government (DILG) nga maggahin og dugang P1 bilyon alang sa pagpalit og mga water tanker truck ug uban pa’ng kagamitan sa pag-apod-apod og tubig isip pagpangandam sa posibleng epekto sa El Niño, ilabina sa Sugbo.

Matud ni DILG Secretary Jonvic Remulla, usa ang Sugbo sa mga lugar nga posibleng grabeng maapektohan sa kakulang sa suplay sa tubig sa panahon sa maong weather phenomenon.

Gitumong ang dugang pundo aron madugangan ang kapasidad sa mga local government unit (LGU) sa paghatud og tubig ngadto sa mga komunidad nga posibleng makasinati og kakulang sa suplay.v Gisugdan na sa ahensiya ang pagpangandam alang sa procurement sa mga water tanker diin gilaoman ni Remulla nga mahuman kini sa Enero sunod tuig depende sa availability sa mga unit nga mapalit. Gawas sa mga water tanker, gikonsidera usab sa gobiyerno ang paggamit og mga desalination boat aron makatabang sa paghatag og tubig sa mga isla ug hilit nga komunidad nga naglisod sa pagkuha og preskong tubig.

Wala hinuon maghatag ang kalihim og detalye kon pila ka water tanker ug desalination equipment ang planong paliton o unsang mga lugar ang unang makadawat niini.

Gimandoan ni Remulla ang mga lokal nga pangulo nga ilhon ug imbentaryohon ang mga kasamtangang tinubdan sa tubig ilabina sa mga lungsod nga nahimutang sa mga isla aron masayran ang mga lugar nga nagkinahanglan og dugang tabang.

Giawhag usab niya ang mga LGU nga mopalit og mga sudlanan sa tubig sama sa mga drum aron adunay magamit ang mga panimalay sa pagtipig sa tubig nga ihatud pinaagi sa mga tanker. Sa iyang pakigpulong, gitumbok sa kalihim nga usa sa mga hagit sa Sugbo ang pagkuha og tubig tungod sa geological nga kinaiya sa probinsiya diin anaa ang mga dapit nga gilangkuban sa limestone.

Matud usab ni Remulla nga nihangyo na siya sa fire chief nga maghatag og dugang water tanker aron makatabang sa paghatud og tubig sa mga residente panahon sa krisis.

Gipadayag ni Remulla nga modugang sa gasto sa mga lokal nga kagamhanan ang paghatud og tubig apan matud niya nga ang pagtabang sa katawhan maoy angay unahon bisan pa sa ilang politikal nga kalambigitan.  BDB BANAT NEWS