COA nipahimangno sa opisyales sa Liloan sa Anti-Epal

CEBU, Philippines — Gisita sa Commission on Audit (COA) ang Munisipyo sa Liloan tungod sa pagbutang sa mga ngalan, litrato, inisyal, logo ug uban pa’ng timailhan sa lokal nga opisyales sa mga materiyales nga gipundohan sa gobiyerno nga posibleng makalapas sa mga lagda batok sa dili kinahanglang politikanhong pagmarka.

Base sa audit findings, nakita sa COA nga ang mga tarpaulin nga gigamit sa nagkalain-laing programa ug kalihokan sa munisipyo lakip na ang mga sakyanan sa lokal nga kagamhanan adunay mga ngalan, litrato, tagline ug inisyal sa mayor ug ubang opisyales.

Matud sa COA nga supak kini sa mga lagda sa gobiyerno ubos sa kampaniya sa Anti-Epal ug mahimong maghatag og impresyon nga gigamit ang mga proyekto ug programa nga gipundohan sa publiko alang sa politikanhong promosyon.

Lakip sa mga materiyales nga gihisgotan sa COA ang mga tarpaulin, sobre, sakyanan ug uban pa’ng susamang butang nga adunay mga litrato, ngalan, logo ug inisyal sa mga opisyal.

Gibase sa COA ang obserbasyon sa DILG Memorandum Circular No. 2010-101, nga nagdili sa pagbutang sa mga ngalan, inisyal, hulagway o litrato sa mga personalidad sa gobyerno sa mga billboard, signage ug uban pa’ng materiyales nga adunay kalabotan sa mga programa, proyekto ug kabtangan sa gobiyerno.

Ubos sa maong lagda, ang opisyal nga selyo o ngalan lang sa lokal nga pangagamhanan ang angay ibutang sa mga proyekto ug kabtangan sa gobiyerno.

Gitugotan usab ang mga detalye sa contact sama sa website o email address sa lokal nga gobiyerno.

Gikutlo usab sa COA ang COA Circular No. 2013-004 nga nag-ingon nga dili kinahanglang ibutang sa mga karatula sa proyekto ang mga litrato, motto, logo, kolor, inisyal ug uban pa’ng simbolo nga nalambigit sa mga nag-unang opisyal sa ahensiya o opisina nga nagpatuman niini.

Dili lang paggamit sa mga karatula apil usab sa gidili ang maong mga marka sa mga kagamitan, pasilidad, sakyanan, sudlanan, souvenir, kalendaryo, ballpen, T-shirt ug uban pa’ng materiyales sa publisidad nga adunay kalabotan sa mga programa ug proyekto sa gobiyerno.

Giapil usab ang maong mga probisyon sa 2025 General Appropriations Act ilabi na sa Section 19 nga nagdili sa pagbutang sa ngalan, litrato, hulagway, motto, logo, kolor, inisyal o ubang simbolo nga nalambigit sa bisan kinsang opisyal sa gobiyerno sa mga karatula sa mga programa, kalihokan ug proyekto nga gipundohan ubos sa maong balaod.

Girekomendar sa audit team nga ang mayor sa Liloan ug ang ubang hingtungdang opisyal mohunong sa pagbutang sa ilang mga ngalan, inisyal, logo ug litrato sa mga programa, proyekto, kalihokan ug kabtangan sa munisipyo aron masiguro ang pagsunod sa mga lagda.

Wala mag-ingon ang audit report nga gigamit gyud ang maong mga materiyales alang sa partisanhong kalihokan apan gitumbok niini ang kabalaka nga ang pagbutang sa mga timailhan sa opisyales mahimong maghatag og impresyon sa politikanhong promosyon.

Sa ilang tubag sa audit observation, nipasabot ang lokal nga kagamhanan nga ang pagbutang sa mga timailhan sa mga opisyal sa pipila ka materiyales gituyo aron mapalambo ang kahibalo sa publiko ug mas mailhan ang mga programa dili aron gamiton sa partisanhong kalihokan o promosyon.

Giila usab sa lokal nga kagamhanan ang panginahanglan sa hugot nga pagsunod sa mga lagda ug miingon nga ilang ipahiuyon ang umaabot nga mga pamaagi sa mga giya nga gipatuman.  BDB BANAT NEWS