Mga departamento sa Cebu City Hall pasumitehon og report

CEBU, Philippines — Gihangyo ni Konsehal Francis Esparis ang tanang departamento ug buhatan sa kagamhanan sa Dakbayan sa Sugbo nga mosumite og report kabahin sa ilang mga target nga programa ug proyekto sa nilabay’ng tulo ka tuig lakip na ang actual nga mga nahimo niini. Subay sa resolusyon ni Espares nga giaprobahan sa konseho gikinahanglan nga isumite sa tanang hingtungdang departamento ug opisina ang maong report sulod sa 15 ka adlaw gikan sa pagdawat sa resolusyon.

Tumong niini nga masayran sa konseho kon natuman ba ang mga target nga gilatid nga mga strategic planning ug unsa kadako ang actual nga nahimo ug unsa ang mga hinungdan kon adunay mga programa o proyekto nga wala matuman.

Subay usab sa resolusyon nga ang matag tuig nagpahigayon og estratehikong pagplano ang nagkadaiyang departamento, opisina ug espesyal nga lawas sa lokal nga kagamhanan aron matino ang mga programa ug target nga gikinahanglang matuman alang sa mas episyente ug epektibong paghatag og serbisyo publiko. Gitumbok sa resolusyon nga ang maong mga proyekto ug programa gipundohan pinaagi sa buhis sa katawhan hinungdan nga angayan lang nga susihon kon ang gigahin nga pundo ug ang giplanong mga kalihokan aduna ba’y maayong resulta.

Pinaagi niini, makabaton ang konseho og klarong hulagway sa kalambigitan tali sa mga giplano ug sa actual nga nahimo sa matag departamento.

Ang maong hangyo ni Esparis mahimo usab nga basehan sa pag-ila sa mga hagit nga nakababag sa pagpatuman sa mga target nga programa ug proyekto ug sa pagtino kon gikinahanglan ba ang intervention pinaagi sa legislation.

Alang kang Esparis ang maong resolusyon maghatag usab og klaro nga pag-monitor sa performance sa mga departamento sa siyudad.

Dugang ni Esparis nga maka-timbang-timbang usab ang konseho kon ang mga programa ug proyekto sa siyudad natuman ba sumala sa giplano ug kon unsang mga lakang ang angay’ng buhaton aron mapauswag ang paghatag og serbisyo sa katawhan. — /BDB (BANAT NEWS)