Pamilya sa mga pasyente sa VSMMC nihangyo og lugar nga kapahulayan

CEBU, Philippines — Ang mga sakop sa pamilya sa mga pasyente sa Vicente Sotto Memorial Medical Center (VSMMC) napugos sa pagkatulog sa karton daplin sa ospital tungod kay dili sila pwedeng magpabilin sulod sa mga ward ug dili usab nila makaya ang gasto sa pag-abang og kapuy-an.

Alang kang Raquel Casil, 57, taga-Loay, Bohol, ug Joshua Lem Languido, 23, taga-Daanbantayan nga ang pagpahulay sa gawas sa ospital maoy nahimong kapilian aron magpabiling duol sa ilang mga sakop sa pamilya nga nanginahanglan og pag-atiman.

Ang ilang hangyo nga hatagan sila og luwas nga lugar sulod o duol sa ospital diin mahimo sila’ng molingkod o mohigda samtang naghulat sa ilang mga pasyente.

Si Casil nianhi sa Sugbo kauban ang iyang anak ug umagad aron mouban sa iyang 11-anyos nga apo nga naospital.

Ug tungod kay usa ra ka watcher ang gitugotan nga magpabilin tupad sa pasyente, mag-ilis-ilis sila sa pagbantay sa bata.

Ang mga dili awtorisadong watcher kinahanglang mangita og laing kapahulayan sa gawas.

Napugos sila’ng mogawas sa compound ug mogamit og karton isip higdaanan.

Gihangyo niya ang mga hingtungdan nga hatagan og pagtagad ang kaluwasan sa mga pamilya nga matulog sa gawas diin naladlad sila sa mga sakyanan ug sa ubang posibleng peligro.

Sama kang Casil, walay laing kapilian si Languido gawas sa pagpabilin sa gawas sa ospital tungod sa gasto sa pag-abang og kwarto samtang nagpaospital ang iyang inahan.

Hapit na usa ka semana siya’ng nagpabilin sa VSMMC.

 Ang iyang 51-anyos nga inahan anaa sa intensive care unit (ICU) tungod sa mga problema sa kasing-kasing ug atay.

Si Languido ang bugtong sakop sa pamilya nga nag-uban sa iyang inahan ug bisan pa sa iyang kabalaka sa kahimtang niini kinahanglan gihapon siya’ng mogawas sa ospital sa gabii.

Ubos sa Hospital Order No. 2024-123, usa ra ka awtorisadong watcher matag pasyente ang tugotan nga magpabilin tupad sa pasyente.

Ang maong tawo kinahanglang moagi sa screening ug makadawat og pagtugot gikan sa ospital.

Matud sa VSMMC nga gipatuman ang palisiya aron malikayan ang paghuot sa mga lugar diin ginahatagan og pag-atiman ang mga pasyente, mapanalipdan ang kaluwasan ug malikayan ang pagkaylap sa impeksiyon.

Sa iyang bahin, si Gobernador Pamela Baricuatro nagkanayon nga nabalaka siya sa kahimtang sa mga pamilya nga naghulat ug matulog sa gawas sa VSMMC.

Matud niya nga bisan national government hospital kini ubos sa Department of Health (DOH) daghang Cebuano ang naapektohan ug kinahanglang tabangan.  BDB BANAT NEWS