Echo, Carlo, Maris ug Odette , nagmadaogon sa gawad Urian

CEBU, Philippines — Nagtabla isip Best Actor sila Jericho Rosales sa pelikulang “Quezon” ug Carlo Aquino sa “Bar Boys: After School” sa ika-49 nga Gawad Urian.

Nagtabla usab  sa award nga Best Actress ang mga aktres nga sila Maris Racal sa “Sunshine” ug Odette Khan sa “Bar Boys: After School.” Gipahigayon ang seremonya niadtong Huwebes sa gabii didto sa Teresa Yuchengco Auditorium sa De La Salle University, Taft Avenue, Manila.

Nakuha sa “Bloom Where You Are Planted” ang Best Picture, samtang si Noni Abao ang nakadaog sa Best Direction alang sa maong pelikula. Nakadaog usab kini sa Best Documentary ug Best Editing pinaagi kang Che Tagyamon.

Si Pong Ignacio maoy nakadaog sa Best Cinematography alang sa “Quezon,” samtang si Renei Dimla ang nakadaog  sa Best Screenplay alang sa “Republika ng Pipolipinas.”

Gihatagan usab og Natatanging Gawad Urian si Laurice Guillen.

Sa ubang kategoriya, si Will Ashley ang napili isip Best Supporting Actor alang sa “Bar Boys: After School,” samtang si Jennica Garcia maoy  Best Supporting Actress alang sa “Sunshine.”

Ang “Cemento” nakadaog sa Best Short Film, si Monica Sebial sa Best Production Design alang sa “Quezon,” si Jerrold Tarog sa Best Music alang gihapon sa “Quezon,” ug si Emilio Bien Sparks sa Best Sound alang sa “Cinemartyrs.”