Abang sa balay, boarding houses dili patas-an

CEBU, Philippines — Giawhag ni Konsehal Sisinio Andales ang tanang landlord o tag-iya og mga giparentahan og kwarto ug balay nga dili una magpasaka sa ilang presyo sa abang tungod sa nagpadayon nga pagsaka sa presyo sa gasolina ug uban pang batakang palaliton nga dakog epekto sa pinansyal nga kahimtang sa mga Sugbuanon.

Suma pa sa resolusyon ni Andales, ang datos sa Philippine Statistics Authority nagpakita nga misaka ngadto sa 6.1 porsyento ang headline inflation sa nasud niadtong Agosto 2026.

Misaka usab ang presyo sa plitehan og 13.5 porsyento, samtang ang presyo sa housing, tubig, kuryente, gas ug krudo misaka og 7.9 porsyento. Dugang pa niini, giingong misaka sab pag-ayo ang presyo sa krudo niadtong Septiyembre 2026. Lakip niini ang P5.68 kada litro nga pagsaka sa gasolina, P4.31 sa diesel, ug P4.62 sa kerosene. Ang maong pagsaka sa presyo adunay sunod-sunod nga epekto sa gasto sa pagkaon, transportasyon, utilities, produkto ug serbisyo.

 Tungod niini, gamay nalang ang nahibiling kita sa daghang ordinaryong pamilya ug mas nahimong lisod ang pagbayad sa binuwan nga abang ug uban pang pinansyal nga obligasyon. Gisaysay ni Andales ang katungod sa mga landlord ug property owners nga makadawat og makatarunganong kita gikan sa ilang mga gipaabangan ug mabawi ang lehitimong gasto sa pagmentinar niini.

Apan gihimug-atan sa resolusyon nga ang kasamtangang kahimtang sa ekonomiya nagkinahanglan og kalooy, panaghiusa ug responsibilidad sa tanang sektor aron matabangan ang mga nag-abang nga naglisod tungod sa pagsaka sa presyo sa mga palaliton.

Gilauman nga ang temporaryong pagpahunong o pagpalangan sa giplanong pagsaka sa abangan mahimong dakong tabang sa mga pamilya, trabahante, estudyante, senior citizens, gagmay’ng negosyante ug uban pang nag-abang nga naapektuhan sa pagsaka sa inadlaw-adlaw nga panginahanglanon.

Ang resolusyon giapbrubahan sa konseho tungod kay ang maong boluntaryong pagpugong sa pagsaka sa presyo sa abangab makatabang dili lang sa paghatag og temporaryong kapuy-an sa mga nag-abang ug lugar sa negosyo, apan mahimo usab nga makapalig-on sa maayong relasyon tali sa mga landlord ug nag-abang niining lisod nga panahon.

Ang lakang ni Andales nagtumong sa paghatag og temporaryong ginhawa sa mga Sugbuanon nga naglisod sa kadako aa gastuhan matag adlaw samtang gidasig ang kooperasyon tali sa mga nagpaabang ug mga nag-abang aron matubag ang epekto sa kasamtangang presyur sa ekonomiya. — IBM BANAT NEWS