Mga taytayan ug undersea tunnels pagkonektar sa Visayas

CEBU, Philippines — Si House Minority Leader Marcelino “Nonoy” Libanan niduso og tulo ka bills nga nagtinguhang pagtukod og mga taytayan o ba kaha undersea tunnels nga permanenteng magkonektar sa mga probinsya sa Cebu , Negros Oriental, Cebu ug Bohol, ug Bohol ngadto sa Southern Leyte.

“These proposed marine links are about connecting communities, opening economic opportunities, and making the movement of people and goods between our islands more efficient,” matud pang 4Ps party-list representative Libanan.

Matud pa niya, kinahanglang mangita og laing permanenteng koneksyon sa transportasyon nga makapalig-on sa pagkonektar sa tibuok kabisay-an pinaagi sa maong mga imprastraktura.

Ang iyang House Bill No. 11499 nagsugyot pagtukod og taytayan o undersea tunnel gikan sa lungsod sa Santander sa Cebu padung sa lungsod sa Sibulan sa Negros Oriental.

Kani nga taytayan o undersea tunnel kinahanglang konektado sa mga dalan sa Sugbu.

Samtang ang House Bill No. 11500, nagtinguha og susamang proyekto nga makonektar sa Getafe sa Bohol ug lungsod sa Cordova sa Cebu.

Ang Cebu-Bohol link tumong nga mahatagan og direktang agianan ang mga tawo ug produkto sa duha ka probinsya ug makahatag og daghang oportunidad sa serbisyo, trabaho, batakang serbisyo ug ekonomikanhong kalihokan.

Unya ang House Bill No. 11501  susama gihapong imprastraktura ang planong tukoron nga magkonektar sa Maasin City isan Southern Leyte padung sa Ubay, Bohol via Lapinig Island.

“These projects should be studied carefully and comprehensively before any construction decision is made,” matud pang Libanan. – IBM BANAT NEWS