Sunog sa Basak San Nicolas, 35 ka pamilya naapektahan
CEBU, Philippines — Mokabat sa gibanabanang P152,000 ang kantidad sa mga kabalayan nga naapektahan sa sunog nga mitumaw sa South Road corner Cabrero St., Barangay Basak San Nicolas, Cebu City kagahapon sa buntag, Oktubre 2, 2026.
Sumala pang FO2 Dave Kirvy G. Miñoza, fire arson investigator sa Cebu City Fire Station, nadawat sa Cebu City Fire Station ang report bahin sa sunog alas-11:11 sa buntag ug mipahawa ang fire engine usa ka minuto human niini.
Nakontrolar ang sunog alas-11:45 sa buntag ug hingpit nga napalong alas-12:23 sa udto. Walay natala nga namatay o naangol sa maong insidente.
Ang sunog nahitabo sa residential area nga giokupar ni Glenn Villareal.
Padayon ang imbestigasyon sa Bureau of Fire Protection aron matino ang hinungdan sa sunog.
Moabot ngadto sa 35 ka pamilya o 135 ka indibidwal ang naapektuhan sa sunog.
Sa taho sa Bureau of Fire and Protection-7 sa ala 1:46 sa hapon, adunay 18 ka balay nga naapektuhan sa insidente. Dose niini ang naugdaw samtang unom ang partially damaged.
Sa initial report sa Department of Social Welfare and Services (DSWS), 35 ka pamilya nga naapektuhan kun diin walo ang sharer, siyam ang renter, 14 ang lodger, ug usa ang AO.
Ang mga naapektuhan nga pamilya ug indibidwal gipabalhin sa Fort San Pedro gym aron adunay temporaryo nga kapasilungan.
Mohatag sab ang kagamhanan og pagkaon alang sa mga biktima nga naa sa gym. Padayon ang mga imbestigador sa pagtino sa sunog sa maong lugar. — /IBM (BANAT NEWS)
- Latest
