Usbaw nga P1 ug P2 sa pletihan gipatuman na

CEBU, Philippines — Daghang nakurat sa pagpatuman sa umento sa pletihan nga nagsugod kagahapon, adlaw nga Lunes, Septiyembre 28 mga PUV sa tibuok nasud.

Misaka ngadto sa P14 gikan sa P13 ang minimum fare sa traditional jeepney ug P17 gikan sa P15 sa modern jeepney.

Gipasabot sa Land Transportation Franchising and Regulatory Board (LTFRB) nga dili pa kinahanglan ang opisyal nga fare matrix aron ipatuman ang increase.

Temporaryong fare guide nga mahimong i-download ug i-print gikan sa website sa LTFRB igo na sa pagkakaron.

Apan daghang mga pasahero ang nakalitan sa maong kamandoan.

Gani naay mga drayber sama sa Bulacao-Pardo-SM nga rota ang nipakita og bag-o daw nga matrix sa pasahero nga nangreklamo sa kalit-kalit nga usbaw sa pletihan nga nisaka gikan P3 sa mga seniors ug P5 sa ubang pasahero.

Matud ni acting LTFRB Chairman Atty. Greg G. Pua Jr., balido ang temporaryong fare guide hangtod Disyembre 31, 2026.

Magsugod sa Enero 2027 ang pag-isyu sa opisyal nga fare matrix, human mabayran ang applicable fare increase fee atol sa confirmation sa units.

Sa traditional jeepney, P14 na ang minimum fare sa unang upat ka kilometro ug P2 ang matag sunod nga kilometro. Sa modern jeepney, P17 ang minimum fare ug P2.40 ang succeeding kilometer rate.

Nagpabilin ang 20-percent discount alang sa mga estudyante, senior citizens ug PWDs.

Misaka usab ang fares sa ubang PUV sama sa city ug provincial buses, UV Express, taxis, TNVS ug point-to-point buses.

Transport Strike

Apan bisan pa sa fare increase, mopadayon gihapon ang PISTON-Cebu sa transport strike karong Martes, Septiyembre 29 kay wala sila matagbaw.

Matud ni PISTON-Cebu president Greg Perez, dili igo ang P1 increase sa traditional jeepney ug P2 sa modern jeepney aron matubag ang pagsaka sa presyo sa gasolina, operating expenses ug ubang panginahanglan sa mga drayber.

Matud niya, mangandam ang grupo og upat ka choke points, apan dili tumong nga maparalisa ang transportasyon sa Cebu.

 “Wala mi plano i-paralyze ang transportasyon. Pero wala ta kabalo sa ubang grupo sa transportasyon nga moapil sad sila,” matud niya.

Ang strike sa Cebu himoon gikan alas-6 sa buntag hangtod alas-12 sa udto, ug dili na ipadayon sa ikaduhang adlaw.-  IBM BANAT NEWS