Administrator sa Cebu City gipaubos sa imbestigasyon

CEBU, Philippines — Kasamtangang naka-leave si City Administrator Albert Tan ug wala pa mahibaw-i kong kanos-a kini mobalik sa Cebu City Hall.

Nasayran nga si Tan gipaubos kini og imbestigasyon tungod sa mga reklamo nga nadawat batok kaniya.

Gitudlo ni Mayor Nestor Archival si City Attorney Briccio Joseph Boholst isip acting city administrator samtang magpadayon gihapon siya sa iyang katungdanan isip city attorney tungod kay gipaabot nga mahuman ang imbestigasyon kang Tan tungod sa mga reklamo kalabot sa sestema sa Bids and Awards Committee (BAC).

Matud ni Kenneth Siasar, chief of staff ni Archival nga ang temporaryong paglingkod ni Boholst nahitabo human makadawat ang opisina sa mayor og mga reklamo gikan sa pipila ka suppliers kalabot sa sestema nga gipatuman sa BAC.

Giingong sensitibo ang mayor sa mga kabalaka sa publiko ug nakadesisyon si Tan nga boluntaryong magpadaplin aron hatagan og higayon ang mayor sa pagpahigayon og mas lawom nga imbestigasyon.

Si Tan personal nga nidala og suwat ngadto sa mayor nga mo leave siya aron matubag ang mga kabalaka ug mahatagan usab siya og higayon nga malimpiyo ang iyang ngalan.

Gihimakak ni Siasar nga resignation ang maong suwat.

Wala usab nibutyag si Siasar sa klarong petsa kong kanos-a makabalik si Tan sa iyang katungdanan tungod kay magdepende kini sa resulta sa imbestigasyon ug sa desisyon sa mayor kong ibalik ba siya o ipadayon ang kasamtangang acting arrangement.

Ang resulta sa imbestigasyon ug ang sunod nga desisyon sa mayor maoy magtino kong makabalik ba si Tan sa iyang katungdanan o ipadayon ang kasamtangang kahimtang.  BDB BANAT NEWS