Love at first spike, nominado sa international Emmy Awards

MANILA, Philippines — Nakakuha ng nominasyon ang 2025 iWant original serye na Love at First Spike sa International Emmy Awards 2026 bilang kaisa-isang kalahok mula sa Pilipinas sa taunang global media awards.

Nominado ang programa sa Kids: Live Action category ng patimpalak, kasabay ang mga entry mula Chile, Netherlands at UK.

Gaganapin ang awards gala sa New York ngayong Nobyembre 23 (Lunes, US Time).

Sa direksyon ni Ivan Andrew Payawal, pinagbidahan ito nina Emilio Daez, Reign Parani at Sean Tristan. Sumentro ang kuwento nito sa isang dating basketball team captain na napasali sa boys volleyball team ng kanilang paaralan para maisalba ang kanyang scholarship.

Kinilala ang serye para sa mga tema nito ng pagtanggap, pagbali sa gender stereotypes sa LGBTQIA+ community, at sa pagsalamin sa mga pinagdaraanan ng student athletes.