Team Philippines ‘di nabokya sa Medalya, naka-2 tanso

MANILA, Philippines — Hndi nabakante sa medalya ang Team Philippines sa 20th Asian Games matapos ang podium finish ni hurdler John Cabang Tolentino at ng SIBOL team kahapon sa Aichi-Nagoya, Japan.i

Nagsumite ang Fil-Spanish na si Tolentino ng season-best 13.48 se­conds para itakbo ang bronze medal sa finals ng men’s 110-meter hurdles ng athletics competition sa Mizuho Park Athletics Stadium.

Ito ang unang athletics medal ng Pilipinas sa Aichi-Nagoya Asiad.

Ang medalya rin ng 2024 Paris Olympian ang kauna-unahan ng Pilipinas sa track events ng Asiad athletics matapos ang bronze ni Elma Muros sa women’s 400m hurdles sa 1990 edition sa Beijing, China.

Nag-ambag din ng tansong medalya ang SIBOL team matapos ang 0-2 pag­yukod sa Indonesia, 0-2, sa semifinals ng Pokémon UNITE esports event sa Aichi Sky Expo Hall.

Ito rin ang kauna-una­hang esports medal ng bansa sa Asian Games.

Kumolekta na ang Pilipinas ng walong bronzes sa Aichi-Nagoya Asiad bukod sa dalawang golds ni gymnast Carlos Edriel Yulo at tig-isang silver ni mixed martial arts fighter Jean Claude Saclag at ng Gilas Pilipinas Women 3x3 team para pumuwesto sa No. 15 sa medal tally.

Nakasiguro na rin ng bronze ang SIBOL Honor of Kings team mula sa 2-0 pagwalis sa Korea patungo sa semis kung saan nila makakatapat ang China.

Sa weightlifting, kinapos sa tanso si Kristel Macrohon matapos ang fourth-place finish sa finals ng women’s -69kg.

Sa boxing, talo si Jun­milardo Ogayre kay Abdumalik Khalokov ng Uzbekistan, 0-5, sa men’s 60-kilogram quarterfinals.

Tatarget ng semis spot para sa bronze sina Tok­yo Olympics silver meda­lists Nesthy Petecio at Carlo Paalam sa kanilang pagharap sa mga Chinese sa quarterfinals ngayong hapon.

Lalabanan ni Petecio si Yang Chengyu sa wo­men’s 60kg division, habang makakatapat ni Paalam si Jiamao Zhang sa men’s 55kg class.

Sa lawn tennis, talsik kaagad si Tenny Madis sa women’s singles matapos ang 1-6, 1-6 pagkatalo kay Japanese Hikari Sakatsume.

Sa gymnastics, hindi nakapasok sa finals sina Jerry Ilano Jr. (11th) at Luvicar Janine Padilla (10th) sa men’s at women’s individual trampoline, ayon sa pagkakahilera.

Sa athletics, minalas sa finals spot sina Jazzpeer Arcenal (11th) at Lauren Hoffman (9th) sa heats ng men’s at women’s 400m hurdles, ayon sa pagkakasunod.

Sa men’s beach volleyball, yumukod sina Alas Pilipinas pair James Buytrago at Ronniel Rosales kina Sofyan Efendi at Bintang Akbar ng Indonesia, 11-21, 13-21, sa Pool C preliminary phase.