Suspetsadong durugista subling nasikop sa buy-bust

CEBU, Philippines — Usa ka 40-anyos nga lalaki nga giingong bag-ong nakagawas sa prisohan ang nasikop pag-usab atol sa gipahigayong buy-bust operation sa kapolisan kagahapon sa buntag sa Dakbayan sa Sugbo.

Ang suspetsado giila nga si alyas “Peter”, taga Lungsod sa Minglanilla nasikop atol sa buy-bust operation sa Regional Police Drug Enforcement Unit (RPDEU)-7 diha sa Barangay Sta. Cruz niining siyudad.

Nasakmit gikan sa suspetsado ang 105 gramo nga shabu nga gibana-banang nikantidad ngadto sa P714,000.

Gikataho nga sulod sa tulo ka adlaw’ gipanid-an sa mga polis ang kalihokan sa suspetsado kinsa giingong maka-dispose og 100 ka gramong shabu matag semana sa Dakbayan sa Sugbo ug sa mga kasikbit nga lugar.

Nasayran nga ang suspetsado bag-o lang kining nakagawas gikan sa prisohan ug base sa taho sa kapolisan nasikop na kini niadtong 2015 ngadto sa 2016 ug nibayad kini og piyansa alang sa iyang temporaryong kagawasan ug nadakpan pag-usab niadtong 2018.

Matud sa kapolisan nga gikan sa sulod sa prisohan ang tinubdan sa suspetsado.  BDB BANAT NEWS