Seguridad sa 2-araw na tigil-pasada, tiniyak ng pulisya

MANILA, Philippines — Binigyan ng kasiguraduhan ng National Capital Region Police Office (NCRPO) ang pagpapanatili ng kapayapaan, kaayusan, pagtiyak sa kaligtasan ng publiko at pagbibigay ng tulong sa mga commuter na maaaring maapektuhan ng dalawang araw na transport strike sa Setyembre 29 at 30.

Inatasan ni NCRPO Officer-in-Charge Police Brigadier General Christopher Abrahano ang lahat ng police districts at police stations na makipag-ugnayan sa local government units, transport authorities, at iba pang katuwang na ahensya upang matiyak na nakahanda ang mga hakbang para sa seguridad at pagtulong sa publiko, partikular sa mga lugar na inaasahang dadagsain ng mga pasahero at maaaring makaranas ng pagkaantala o kakulangan sa pampublikong transportasyon.

Binigyang-diin ni Abrahano na iginagalang ng NCRPO ang karapatan ng mga transport group na mapayapang ipahayag ang kanilang mga hinaing ngunit nanawagan siya sa lahat ng lalahok sa transport strike na panatilihin itong maayos at mapayapa.

Nanawagan din siya sa mga kalahok na igalang ang mga transport operator at driver na maaaring magpasiyang magpatuloy sa pagbibiyahe at magsakay ng mga pasahero sa kabila ng transport strike.