Mandaue mogahin og P285M alang sa mga programa sa DRRM

CEBU, Philippines — Gikatakdang mogahin ang kagamhanan sa Dakbayan sa Mandaue og P285 milyones alang sa mga programa sa disaster risk reduction and management (DRRM) sa sunod tuig diin kinadak-ang bahin sa pundo igahin alang sa disaster preparedness.

Ang maong pundo gilatid sa 2027 Local Disaster Risk Reduction and Management Fund Investment Plan sa siyudad nga naglangkub sa 49 ka programs, projects and activities (PPAs).

Sa kinatibuk-ang pundo, P131.875 milyones ang igahin alang sa 35 ka PPAs alang sa disaster preparedness.

Giplano usab nga mogahin og P12.405 milyones alang sa walo ka proyekto nga nagtutok sa disaster prevention and mitigation; P19.72 milyones alang sa tulo ka response ug early recovery programs ug P4 milyones alang sa duha ka rehabilitation and recovery projects.

Lakip usab sa plano ang P72 milyones alang sa Quick Response Fund (QRF) ug P45 milyones alang sa Special Trust Fund.

Ang investment plan giaprobahan atol sa third-quarter meeting sa Mandaue City Disaster Risk Reduction and Management Council (CDRRMC) niadtong Biyernes.

Gipresenta ni City Disaster Risk Reduction and Management Office (CDRRMO) head Buddy Alain Ybañez ang gisugyot nga pagbahin-bahin sa pundo atol sa tigom.

Girepaso usab sa konseho ang third-quarter accomplishment reports sa CDRRMO ug Mandaue City Fire Station nga naglangkub sa ilang mga kalihokan kalabot sa disaster risk reduction and management alang sa maong quarter.

Girepresentahan ni Atty. Riczen Gingoyon si Mayor Thadeo “Jonkie” Ouano atol sa tigom samtang nitambong usab si Councilor Eugene Andaya, chairperson sa Sangguniang Panlungsod committee on disaster risk reduction and management.

Lakip usab sa nitambong sa tigom ang mga representante gikan sa nagkadaiyang city departments ug national government agencies.