Biodiversity iapil sa urban planning sa siyudad sa Lapu-Lapu

CEBU, Philippines — Giplano sa Lapu-Lapu City Government nga usahon ang pagpanalipod sa biodiversity sa pagplano sa urban development human mipirma og partnership uban sa Department of Environment and Natural Resources-7 (DENR-7) alang sa pagpatuman sa Urban Biodiversity Program.

Matud ni Mayor Ma. Cynthia “Cindi” King-Chan, makatabang ang partnership sa siyudad aron mas masabtan ug mamahimong hapsay ang pagdumala sa biodiversity pinaagi sa assessment ug mapping sa green spaces, pag-develop sa City Biodiversity Index, ug pag-andam sa Biodiversity Management Plan.

Matud niya, kinahanglan nga apil sa pagplano sa pagtubo sa siyudad ang pagpanalipod sa kinaiyahan, lakip na ang mga green spaces, kahoy, waterways, coastal areas ug uban pang natural resources nga gisaligan sa mga komunidad.

Tinguha sa siyudad ang responsableng pag-uswag pinaagi sa pagkahibalo kung unsa nga mga natural resources ang anaa, unsa ang kinahanglang protektahan, ug unsaon kini pag-atiman alang sa umaabot nga mga henerasyon.

Mipirma si King-Chan ug DENR-7 Regional Executive Director Laudemir Salac sa Memorandum of Agreement (MOA) niadtong Biyernes, Septiyembre 25. Mitambong usab sa pagpirma si Vice Mayor Celedonio Sitoy ug ubang mga opisyal sa siyudad ug sa environment sector.

Kabahin sa kasabutan ang pagmugna og Urban Biodiversity Composite Team nga maoy mokoordinar sa pagpatuman sa programa.

Pangulohan sa Cebu Provincial Environment and Natural Resources Officer ang team, samtang si King-Chan ang magsilbing co-chair. Apil usab niini ang technical personnel gikan sa City Environment and Natural Resources Office, City Planning and Development Coordinator’s Office, ug Provincial Environment and Natural Resources Office.

Ubos sa kasabutan, mohatag ang DENR-7 og technical ug advisory assistance, motabang sa paghanas sa mga personnel sa siyudad alang sa biodiversity assessment, mohatag og policy guidance, ug mag-monitor sa pagpatuman sa Urban Biodiversity Management Plan. Motabang usab ang DENR-7 sa siyudad sa pagtino sa City Biodiversity Index, nga gamiton sa pag-assess ug pag-monitor sa mga paningkamot sa pagpreserbar sa biodiversity.

Sa bahin sa city government, gilauman nga i-apil niini ang Urban Biodiversity Program sa Comprehensive Land Use Plans ug zoning ordinances sa siyudad.

Gikinahanglan usab nga i-adopt sa siyudad ang City Biodiversity Index pinaagi sa ordinansa o resolusyon ug dasigon ang partisipasyon sa mga negosyo ug uban pang stakeholders. Tumong sa kasabutan nga ma-integrate ang biodiversity conservation sa urban development, climate adaptation ug disaster risk management planning sa Lapu-Lapu City.

Mitambong usab sa pagpirma sila Cebu Provincial Environment and Natural Resources Officer Atty. Romeo Bulotano Jr., CENR Officer Nolito Lapinig, CENRO Officer-in-Charge Jocelyn Abayan, ug mga miyembro sa City Council nga gipangulohan ni Councilor Rufo Bering, chairman sa Committee on Environment and Climate Change Adaptation. (BANAT NEWS)