Lapu-Lapu City nakatukod og partnership sa PPP center

MANILA, Philippines — Nahimong unang siyudad sa Region VII ang Lapu-Lapu City nga nakatukod og pormal nga partnership uban sa Public-Private Partnership (PPP) Center of the Philippines.

Mipirma si Mayor Ma. Cynthia “Cindi” King-Chan og memorandum of agreement uban sa PPP Center, nga pormal nga nag-abli sa partnership aron mapalig-on ang kapasidad sa siyudad sa pagpalambo ug pagpatuman sa posibleng public-private partnership (PPP) projects.

Pinaagi sa kasabutan, makadawat ang siyudad og technical assistance ug capacity-building support samtang kini nag-ila, nagpalambo ug nag-evaluate sa mga posibleng PPP projects.

Matud ni King-Chan, ang partnership moabot samtang padayon ang siyudad sa pagplano alang sa umaabot nga kalamboan niini ug sa pagsusi sa mga oportunidad nga makatubag sa nagkadakong panginahanglan sa siyudad.

“This partnership is an important step as we continue to plan for the growth of Lapu-Lapu City,” matud ni King-Chan.

Ubos sa kasabutan, makigtambayayong ang siyudad sa PPP Center sa pag-assess sa mga posibleng proyekto ug sa pagsusi sa mga pamaagi sa pakigtambayayong sa mga pribadong sektor.

Matud ni King-Chan nga ang technical guidance gikan sa PPP Center makatabang sa siyudad sa pagpalig-on sa kapasidad niini sa pag-evaluate sa mga proyekto una pa kini ipadayon ngadto sa posibleng mga investment.

Gilauman usab nga ang partnership maghatag og dugang institutional support sa siyudad samtang gitun-an niini ang mga proyekto nga mahimong ipatuman pinaagi sa kooperasyon tali sa gobyerno ug pribadong sektor.

Naglatid usab ang kasabutan og framework alang sa capacity-building aron ang mga opisyal ug personnel sa siyudad makakuha og technical knowledge nga may kalabotan sa pag-andam ug pag-assess sa mga PPP projects.

Mitambong sa pagpirma sa kasabutan sila PPP Center Undersecretary and Executive Director Rizza Blanco-Latorre, Assistant Secretary and Deputy Executive Director Eleazar E. Ricote, Director III Atty. Cyris Ann Ng-Santiago, ug Deputy Executive Director Jeffrey I. Manalo.

Mitambong usab gikan sa Lapu-Lapu City Government sila City Councilor Annabeth Cuizon, Secretary to the Mayor Atty. Misaellee Tejano, City Treasurer Claire Cabalda, ug Lapu-Lapu Chamber of Commerce and Industry President Anthony Noel.

Alang sa Lapu-Lapu, ang pormal nga partnership naghatag og bag-ong oportunidad sa siyudad nga makigtambayayong sa pribadong sektor samtang gipalig-on usab niini ang kaugalingong kapasidad sa pag-evaluate sa mga dagkong development proposals.