Nanghagad og sex gipadakop

CEBU, Philippines — Usa ka 31-anyos nga lalaki ang gidakop sa kapolisan human giingong nanghagad og pakighilawas sa us aka 26-anyos nga babaye diha sa Eskina Mateo sa Barangay Cadaguit sa lungsod sa Sibonga alas 10 pasado sa gabii niadtong Septiyembre 19,2026.

Sumala pa sa Sibonga Police Station, ang babaye nga si alyas “Rufa,” residente sa Barangay Lindogon miduol ra unta sa suspek aron mangutana kung asa ug unsang orasa moagi ang Ceres bus paingon sa Argao.

Matud sa report, gisultihan siya sa suspek nga sayop ang iyang lugar diin magpaabot og bus ug gitudloan siya kung asa magpaabot og bus.

Apan pagabot didto kalit lang daw siya gitanyagan sa suspek og P1,000  baylo sa pakighilawas niini kaniya ug gihikap ang iyang dughan.

Tungod ana, nidangop ang biktima sa usa ka polis nga nag visibility patrol sa maong lugar ug mangayo og tabang.

Misangpot kini sa pagdakop sa suspek nga giila sa kapolisan nga si alyas “Toto,” 31, residente sa Barangay Nug-as, Alcoy, Cebu.

Gidala ang suspek sa Sibonga Police Station diin anaa siya karon sa kustodiya sa kapolisan. Giandam usab sa kapolisan ang kasong may kalabotan sa Republic Act 11313 o ang Safe Spaces Act batok sa suspek.—  IBM BANAT NEWS