VECO dili makagarantiya nga masunod ang schedule sa power interruption

CEBU, Philippines — Ang Visayan Electric Company Inc. (VECO) nipadayag nga dili sila makagarantiya nga kanunay nila’ng masunod hangtud sa kataposang minuto ang gipahibalo nilang schedule sa power interruption tungod sa nag-usab-usab nga kahimtang sa power grid. Gipasabot kini ni VECO Marketing and Communications Manager Erik Monsanto atol sa iyang pag-atubang sa Mandaue City Council niadtong Septiyembre 21, 2021.

Matud ni Monsanto nga ang ilang monitoring sa National Grid Corporation of the Philippines (NGCP) grid gihimo in real time hinungdan nga mahimong mausab ang kahimtang niini sa mubo nga panahon.

Iyang giklaro nga adunay mga higayon nga dili na kinahanglan ang power interruption bisan pa og anaa kini sa gipahibalo nga schedule kong stable ang kahimtang sa grid.

Apan mahimo usab nga mas sayo ang pagpahunong sa suplay kong kalit nga mokunhod ang power supply ug mosamot ang kakulang niini sama sa pagtaas sa alert level gikan sa yellow ngadto sa red.

 Ang mga schedule nga gipatik sa social media accounts sa VECO mga forecast lang kini base sa kasamtangang kahimtang sa grid ug dili garantiya nga mao gyud kini ang hustong oras sa interruption.

Si Monsanto niluwat sa maong pamahayag human nipalabang ang konseho sa siyudad og resolusyon nga nag-awhag sa VECO nga sundon ang gipahibalo nga schedules sa rotational power interruptions aron mamenosan ang kahasol sa mga residente ug mahatagan sila og panahon sa pagpangandam. Niadtong Septiyembre 14, 2026 gihangyo usab sa konseho ang VECO nga hugot nga sundon ang gipatik nga schedules human makadawat og mga reklamo kabahin sa kalit nga pagkawala sa kuryente nga nakaapekto sa mga panimalay ug negosyo. Gihangyo usab sa konseho ang VECO nga mamenosan ang gidugayon sa power interruptions ug pauswagon ang ilang advisories.

Si Monsanto nagkanayon nga dili matagna sa VECO ang hustong kahimtang sa power grid ug ang mga schedule nga ilang gipatik magsilbing giya lang sa mga barangay ug konsumidor. Gikataho nga adunay gipahigayon nga mga pagpaayo sa sestema sa niaging semana apan giila usab niya nga aduna pa’y mga bahin nga kinahanglang pauswagon aron mas sayon kini gamiton.

Gitinguha sa VECO ang pag-normalize sa power supply aron dili na kinahanglan ang rotational power interruptions. BDB BANAT NEWS